Komaleya Ekolojiyê li gundê Goma Husikayê yê Xana Axparê li dijî talankirina xwezayê û kana ponzê ya Şîrketa Oyak Çîmentoyê çalakî li dar xist.
Di 25ê mijdarê bi sedan leşker û polîs bi TOMAyan ji bo parastina kana ponzê ya Şîrketa Oyak Çîmentoyê ya ku li gundê Goma Husikayê yê navçeya Xana Axparê ya Amedê ye, ketin gund. Welatiyên Goma Husika bertek nîşanî kanê û hatina leşker û polîsan dan. Îro bi pêşengiya Komaleya Ekolojiyê ya Amedê bi tevlîbûna parlamenterê Partiya Wekhevî û Demokrasiyê ya Gelan (DEM) ê Wanê Sînan Çîftyurek, Hevşaredarê Pasûrê Mûrat Ay, Hevşeredarê Xana Axparê Şerîf Arzû, Komîsyona Hiqûqê ya Bajêr û Hawirdor a Baroya Amedê û gelek sazî û kesên din li gund çalakî li dar xistin.
‘Ew der cihê dapîr û bapîrên me ne’
Parlamenterê DEM Partîyê Sînan Çîftyûrek di çalakiyê de axivî û cihên ku maden lê hey ji bo şîrketan cihên stratejîk pênase kir û got: “Hikumetê çend meh berê ji bo şîrketan zagonek derxist û bi vê zagonê re heta dawiyê pêşiya şîrketan vekir. Li dijîn vê hewldanê em ê ekolojiyê biparêzin. Ji bo vê jî pêwîste em ekolojîk bijîn. Ev welatê qedîme yê bav û kalên me ye. Heta dawiyê em pişt we ne. Hûn jî berxwedana xwe berdewam bikin.”
Piştî axaftinê girse ji nav gund heya gire ku kan lê hatiye çêkirin meşiyan. Di meşê de pankarta “Xwezaya me xwebûna me ye, em dest jê bernadin” û dowîzên “Em hemberê talanê xweza û jiyana xwe diparêzin” û “Evv der warê bapîr û dapîrên me ne” hatin hilgirtin.
Çalakî bi çandina berûyan bi dawî bû.
