Li Srîlanka, Endonezya, Tayland û Malezyayê, ji ber barana zêde lehî rabû û nêzî hezar kesan mirin. Her wiha bi sedan kes jî winda ne.
Li Girava Sumatra ya Endonezyayê, ji ber lehî û hezazê herî kêm 442 kesan jiyana xwe ji dest dan, bi sedan kes winda bûn. Serokkomar Prabowo Subianto serdana herêmê kir û anî ziman ku ji bo xwegihandina gundên bejahî hêzên hewayî û bejahî hatine seferberkirin. Hikumetê ji bo alîkariyê sê keştiyên leşkerî şand herêmê.
Ev felaket piştî erdheja Palu û tsunamiyê ya sala 2018’an felaketa herî giran e ku bi serê Endonezyayê hatiye.
Li Srîlankayê rewşa awarte hate ragihandin
Li Srîlankayê jî herî kêm 334 kesan jiyana xwe ji dest dan, bi sedan kes winda ne. Rayedaran diyar kirin ku li gel lehî û hezazê, piştî bagera Ditwahê ji bo rizgarkirina kesên winda bûne bi helîkopteran operasyoneke berfireh hatiye destpêkirin.
Serok Anura Kumara Dissanayake anî ziman ku ew bi yek ji felaketên herî mezin ê welêt re rû bi rû ne, rewşa awarte ragihand û banga alîkariya navneteweyî kir.
Li Taylandê 176 kesan jiyana xwe ji dest dan
Li başûrê Taylandê ji ber lehiyê 176 kesan jiyana xwe ji dest dan. Rexneyên gel ên li hemberî hikumetê zêde bûn. Ji ber kêmasiya di rêvebirina krîzê de 2 rayedarên xwecihî ji wezîfeyê hatin dûrxistin.
Li eyaleta Perlisê ya Malezyayê ji ber barana zêde 2 kesan jiyana xwe ji dest dan.
Pispor dibêjin, li gel barana musonê her wiha bûyerên germa zêde ya ji ber guhertina avhewayê, felaketên lehiyê giran bûn.
