Amed – Rojnameger Hakki Boltan di 33yemîn salvegera bombekirina rojnameya Ozgur Ulkeyê de rojnameger Ersîn Yildiz ê ku hatibû kuştin bi bîr anî û got: “Ozgur Ulke ronahiya raya giştî bû.”
Di 3ê yê Kanuna 1994an de li Stenbolê yek, li Enqereyê sê avahiyên Rojnameya Ozgur Ulkeyê hatibûn bombekirin. Di teqîna li Stenbolê de xebatkarê Ozgur Ulkeyê rojnameger Ersîn Yildiz jiyana xwe ji dest dabû û 23 xebatkarên Ozgur Ulkeyê birîndar bûbûn. Di salvegera bombekirina rojnameya Ozgur Ulkeyê ya 33yemîn de Ersîn Yildiz îro tê bibîranîn. Tevî bombekirin, kuştin, girtin û zextan jî çanda Çapemeniya Azad kêliyek jî bi paş ve gav neavêt û her rojnameya li ser rêya Ozgur Ulkeyê heqîqetê ragihand. Hevserokê YEW-KURDê rojnameger Hakki Boltan bi minasebeta salvegera bombekirina Ozgur Ulkeyê axivî.
‘Ozgur Ulkeyê di nav agir de kar û xebat dikirin’
Hakki Boltan diyar kir ku rojnameya Ozgur Ulkeyê ji bo gelê Kurd xwedî cîhekî girîng bû. Hakki Boltan behsa roja bombekirina rojnameyê kir û wiha got: “Rojnameya Ozgur Ulke rengekî nû derxistibû, ev reng jî rengê Çapemeniya Azad bû. Pêşengiyeke xurt ji Çapemeniya Azad re dikir. Raya giştî di wan rojên reş û tarî de bi nûçeyên Ozgur Ulkeyê ronî dibû. Ew xebatên Ozgur Ulkeyê desthilatdariya faşist ya wê demê serûbin dikir. Bêtehemuliyeke mezin li hemberî Kurdayetiyê, tekoşîna Kurdayetîyê hebû. Nedihat xwestin ku tekoşîn, maf û pêwîstiyên Kurdayetiyê ji aliyê Kurdan ve bê zanîn, bê fêmkirin. Lê Ozgur Ulkeyê ji bo van heqîqetan bênavber bi awayekî xurt di nav agir de kar û xebat dikir.
‘Dewletê ji bo berterefkirina Ozgur Ulkeyê biryar dabû’
Hakki Boltan bal kişand ser polîtîkayên dewletê yên ku li dijî gelê Kurd û Çapemeniya Azad dimeşand û di bombekirina Ozgur Ulkeyê de rol û rista serokwezîra wê demê Tansu Çîllerê vegot. Hakki Boltan bi domdarî wiha got: “Herî dawiyê di 3yê Kanûna 1994an de Ozgur Ulke hate bombekirin. Êdî wan ji xwe re digot ‘me qedand, êdî Çapemeniya Azad nîn e’. Ji xwe raporeke wan, talîmateke wan a wê demê jî hebû. Ji aliyê Serokwezîra demê faşist Tansu Çîller ve hatibû dayîn. 15 roj piştî bombekirinê derket holê. Gotibû ‘hûnê vê rojnameyê berteref bikin’, ferman dabû.”
‘Bi kuştina Ersîn negihiştin armanca xwe’
Rojnameger Hakki Boltan, Ersîn Yildiz bi bîr anî û diyar kir ku dixwestin bi qetilkirina wî rojnamegerên ku bi pîvanên Çapemeniya Azad dixebitîn ji holê rakin û wiha got: “Hevalê Ersîn Yildiz di vê êrişê de şehîd bû. Di şexsê Ersîn Yildiz de dixwestin ku rojnamegerî û rojnamegerên di rê û pîvanên Çapemeniya Azad de dimeşin ji holê bêne rakirin. Lê bi kuştina hevalê Ersîn jî negihiştin armanca xwe. Lê îro bi sedan rojnameger Hevalê Ersîn û yên ku wekî wî hatine kuştin ji xwe re mînak digirin û di rêya wan de dimeşin. Îro jî em ji Naziman bigire heya Cîhanan, ji Apê Mûsa bigire heta Huseyînan di şexsê heval Ersîn de li ber şehadeta wan bejna xwe ditewînin. Eşkerekirina heqîqetê bi tu awayî di tariyê de namîne.”
