Amed – Hevberdevka HDKê Meral Daniş Beştaş destnîşan kir ku divê hemû desthilatdarî û muxalefet guh bide banga aştiyê û çareseriyê ya Abdullah Ocalan û got: “Ji bo ku birêz Ocalan vê pêvajoyê bi sehet bi rê ve bibe, divê rojek berî rojekî bigihîje azadiya xwe.”
Şandeya DEM Partiyê ku ji Pervîn Buldan û Sirri Sureyya Onder pêk dihat di 28ê Kanûnê de li Girtîgeha Girava Îmraliyê bi Rêberê PKKê Abdullah Ocalan re hevdîtin pêk anî. Şandeyê di 29ê Kanûnê ango duh jî bi daxuyaniyek nivîskî nêrîn û fikrên Abdullah Ocalan bi raya giştî re parve kir.
Hevberdevka Kongreya Demokratîk a Gelan (HDK) Meral Daniş Beştaş têkildarî peyama Abdullah Ocalan ji Ajansa Welat re axivî.
‘Ocalan muxatabê yekemîn e’
Meral Daniş Beştaş bi bîr xist ku peyama Rêberê PKKê Abdullah Ocalan ku hemû raya giştî li bendê bû duh hat belavkirin û got: “Lê belê demek dirêje tecrîdkirina birêz Ocalan berdewam dike. Ji roja ewilî heta îro her daîm me got pêwîste tecrîd rabe. Me digot hewce ye ku peyam, axaftin û nêrînên birêz Ocalan bigihîje gel. Birêz Ocalan kengê axivî ye gel û raya giştî lê guhdar kiriye. Piştî 10 salan cara yekem e ku şande çû cem birêz Ocalan. Birêz Ocalan ji sala 1993yan û 1999an ve her daîm banga aştiyê û çareseriyê dike û banga azadiyê dike. Bandorek mezin a gotinên wî û fikrên wî li ser gel heye. Muxatabê yekemîn e.”
‘Em ê Konferansa Aştiyê li dar bixin’
Meral Daniş Beştaş anî ziman ku ew wek HDKê rojeva wan a yekemîn aştî û çareserî ye û wiha got: “Em dibêjin gerek li Tirkiyeyê aştiyek mayînde û bi rûmet pêk bê. Divê em vê meseleya aştiyê li her bajarên Tirkiyeyê bi gel re diaxivin.1Em ê di 8-9ê Sibatê de Konferansek Aştiyê li dar bixin. Konferansek navneteweyî ye. Em ê li hemû bajarên Tirkiyeyê qala aştiyê bikin.”
‘Axaftin û peyamên wî bandorê li ser gel dikin’
Meral Daniş Beştaş dibêje, “Hevdîtin û axaftina wî ewqas bandor dike, ewqas rê vedike, lewma divê azadiya birêz Ocalan pêk were.” û axaftina xwe wiha domand: “Ev hevdîtinên pêk tên encamên kampanya ‘Ji Abdullah Ocalan re Azadî’ ye. Bi rastî jî gerek êdî di zindanê de nemîne. Ev pêvajoya ku em dibêjin wê ‘dest pê bike’. Ana hîn pêvajo tune ye. Niha tenê hevdîtinek pêk hatiye. Birêz Ocalan bi xwe jî dibêje, ez dikarim bang bikim lê belê bang nake. Dibêje ez bi xwe bawer im û amade me ku ji bo aştî û çareseriyê her tiştî bikim.”
‘Desthilatdarî û muxalefet divê xwedî li vê bangê derkeve’
Meral Daniş Beştaş da zanîn ku Abdullah Ocalan di peyama xwe de heta ku qala Bahçelî û Erdogan jî kiriye û wiha got: “Em ji vir fam dikin ku ev her du siyasetmedar jî wê di nava vê meseleyê de bin. Ji ber ku îro desthilatdarî kî be, ew jî divê di nav vê tiştê de bin. Lê belê tenê ne desthilatdarî divê hemû muxalefet jî di nava vê pêvajoyê de bin.”
Gavek beriya gavekî divê azad bibe’
Meral Daniş Beştaş destnîşan kir ku ew dibêjin rojekî berî rojekî “divê azadiya birêz Ocalan pêk were” û axaftina xwe wiha bi dawî kir: “Nêrîn û modela birêz Ocalan ji bo Bakur, Rojava, Başûr, Rojhilat, ji bo Tirkiyeyê û hemû Rojhilata Navîn gellek girîng in. Nêrîna wî ji bo gelan pozîtîf e. Dibêje netew-dewlet dema wê qediyaye. Dibêje dem dema netewa demokratîk e. Ev di hepsê de û bi hevdîtinan sehet nameşe. Pêwîste azad bibe. Nêrîn û xebata wî bigihîje gel.”
