Amed – Belgefîlma “Li Kurdistanê Şev û Mij” qala serpêhatiya 7 keçên Êzidî dike. Lîstikvan û çêkera belgefîlmê Fatoş Stêrk bal kişand ser bandora pêvajoya aştî û civaka demokratîk a li ser sînemaya Kurdî û civakê û got got: “Ev pêvajoya ne tenê barê siyasetmedaran e û hin kesan e, barê me hemûyan e. Divê her kes bikeve bin vî barî.”
Di 7 û 14ê Kanûnê de Festîvala Fîlman a Amedê ya 3yemîn bi mazûvaniya Şaredariya Bajarê Mezin a Amedê û bi organîzasyona Komeleya Akademiya Sînemayê ya Rojhilata Navîn û Sînebîrê tê lidarxistin. Festîval bi nîşandan fîlm û belgefîlmên cihêreng berdewam dike. Di festîvalê de 84 fîlm û belgefîlm tên nîşandan û ji van 45 fîlm û belgefîlmên bi Kurdî ne. Yek ji van fîlman jî belgefîlma “Li Kurdistanê Şev û Mij” e. Derhênariya belgefîlmê Şîlan Sadî ya ji Rojhilatê Kurdistanê ye kiriye. Ev belgefîlm qala serpêhatî û rêwîtiya 7 keçên Êzidî ya ji Şengalê ber bi Amedê ve dike. Şîlan Sadî ku derhêneriya belgefîlmê kiriye di Festîvala Fîlman a Female Eye ya li Torontoyê de, xelata belgefilma herî baş a metraj dirêj wergirtibû. Çêkera belgefîlmê Fatoş Stêrk jî beşdarê festîvalê bû û derbarê rewşa sînemayê û pêvajoya ku gelê Kurd têde derbas dibe axivî.
‘Divê her kes barê pêvajoyê bide ser milê xwe’
Fatoş Stêrk bi bîr xist ku festîvala fîlman û sînemeya Kurdî her tim ji ber zextan dihat astengkirin lê bi bidestpêkirina pêvajoya aştî û civaka demokratîk re piştî 8 salan Festîvala Fîlman a Amedê dîsa va tê lidarxistin û wiha got: “Ev pêvajoya ku niha ji bo aştî û azadiyê bi rê ve diçe, ji bo me pirr girîng e. Ji ber şer û pevçûnan me derfet nedidît ku em rêya li ber xwe bibînin. Lê îro em li Amedê ne û demên dawî de jî li çar aliyên Kurdistanê festîvalên fîlman tên lidarxistin. Li her parçeyê hevalên me yên derhêner tên em bi hevparî xebatên xwe dimeşînin. Dîsa bi vî rengî em xebatên xwe zêde dikin. Ev pêvajoya hatiye destpêkirin helbet ji bo qada sînemayê jî pêşketin e. Ev pêvajoya ne tenê barê siyasetmedaran e an jî barê kesan e. Barê me hemûyan e. Divê em hemû vî barî hilgirin ser milê xwe û ji bo pêşerojê û aştiyek mayînde bi hev re ava bikin.”
Belgefîlm qala serpêhatiya keçên Êzidî dike
Fatoş Stêrk bal kişand ser belgefîlma “Li Kurdistanê Şev û Mij” ku çêkiriya wê dike û got: “Ev belgefîlm mînakek e tenê jiyana jinên Êzîdî ye. Ev fîlm mînaka pêvajoya aştiyêye jî. Di sala 2015an de kampa Êzîdiyan hebû ya li Amedê ku girêdayî Şaredariya Amedê bû. Piştî ku qeyûm tayînî ser şaredariyan hate kirin, Êzidiyên li kampê birin Mîdyadê li kampa welatiyên Ereb bicih kirin. Gelek hemwelatiyên me yên Êzidî ku li kampê diman hêdî hêdî berê xwe dan welatên Ewropayê, her kesek bi rêyek cuda çû. Nêzî 8 salan me bi derfetên kêm ev belgefîlm çêkir. Ne tenê ji ber derfetên aborî ji ber ku di belgefîlmê de 7 karakter hebûn û hemû jî derveyî Bakurê Kurdistanê an jî ji welatên din bûn. Ev zehmetî bû. Belê niha belgefîlm tê nîşandan lê em nikarin bêjin ku bi dawî bûye. Ji ber ku jiyana wan 7 karakteran hê jî li penaberiyê berdewam dike. Di belgefîlmê de pêvajoya beriya hatina qeyûman li bajaran çi dibû û piştî qeyûm hatin tayînkirin li bajaran pêvajo bi çi rengî encam dan cîh digire.”
