ENKSê diyar kir ku ragihandina “herêma leşkerî” nîşaneke metirsîdar e ku dê bibe sedema qurbaniyên mezin û xwest ku mafên hemû pêkhateyan destûrê de bêne parastin.
Sekreteriya Giştî ya Encûmena Niştimanî ya Kurd li Sûriyeyê (ENKS) derbarê êrîşa li ser taxên Şêxmeqsûd û Eşrefiyê yên Helebê daxuyaniyek da. ENKSê da zanîn ku valakirina taxan û ragihandina “herêma leşkerî” nîşaneke metirsîdar e ku dê bibe sedema qurbaniyên mezin û koçberiyeke komî; lewma divê civaka navneteweyî ji bo parastina sivîlan demildest bikeve tevgerê û li Sûriyeyê divê mafên hemû pêkhateyan destûrê de bêne parastin.
ENKSê destnîşan kir ku ji ber berdewamiya şer, bi hezaran malbat ji her du taxan û taxên cîran koçber bûne. ENKSê bal kişand ku ev rewş metirsiyeke mezin li ser ewlehî û jiyana bi deh hezaran sivîlên ku li wir dijîn çêdike.
Di dawiya daxuyaniyê de ENKSê tekez kir ku divê rêveberiya Sûriyeyê dest bi pêvajoyeke siyasî ya berfireh bike. ENKSê xwest ku mafên hemû pêkhateyên Sûriyeyê û di serî de mafên gelê Kurd di destûrê de werin parastin da ku aştiyeke mayînde û aramî li welat pêk were.
