Saziyên Hiqûqê li dijî êrişên ser Rojava daxuyanî dan. Hevseroka OHDê ya Stenbolê Eda Obal diyar kir ku piştî HTŞ hat li ser desthilatdariyê, polîtîkayên yekperest zêde bûn û gelê Kurd rastî sûcên mirovahiyê hatin û got: “Çareseriyekê li Sûriyeyê dê bandor li pêvajoya Tirkiyeyê jî bike. Divê tu kes li dijî êrişên ser gelê Kurd bêdeng nemîne.”
Çeteyên HTŞ û SMOyê yên girêdayî dewleta Tirkiyeyê êrişî xwe yên ser Rojava didomînin. Rêveberiya Xweser jî li dijî êrişan seferberiya giştî ragihand û bi gelê Rojava re li ber xwe dide. Li Stenbolê saziyên hiqûqê bi pêşengiya OHDê li Pêşiya Edliyeya Stenbolê ya Çaglayanê daxuyanî dan. Di daxuyaniyê de pankarta “Em êrişên li ser Rojava qebûl nakin” hat vekirin.
‘Em bêdeng namînin’
Hevserokê Giştî yê OHDê Serhat Çakmak di daxuyaniyê de axivî û diyar kir ku ev seleke bû ku li Sûriyeyê hevditîn hebûn û wiha got: “Ev nêzî meheke êriş li ser Rojava hene. Li dijî êrişan em bêdeng namînin. Em ê piştgiriyê bidin Rojava.”
‘Êriş dê bibin sedeme komkujiyan’
Hevseroka OHDê ya Stenbolê Eda Onal daxuyanî xwend. Eda Onal diyar kir ku bi sedema şerê navxweyî yê li Sûriyeyê, bi milyonan kes jiyana xwe ji dest da û wiha axivî: “Di vê serdemê de gelê Kurd bi êrişên DAIŞê re rû bi rû ma. Gelê Kurd ne tenê ewlehiya, xwe ewlehiya herêmê jî parast. Li Rojava rêveberiyeke demokratîk derket holê. Ew rêveberî, ji tevahî cîhanê re bû bersivek. Lê piştî Rejîma Esed hilweşiya bi destê hêzên cuda, HTŞê hat desthilatdariyê. Piştî HTŞ hat li ser desthilatdariyê polîtîkayên yekperest zêde bûn. Di serî de li dijî Elewî paşê Durzî di dawiyê de jî gelê Kurd rastî sûcên mirovahiyê hatin. Pêşî êriş li Helebê, paşê Raqa niha jî dorpêç li ser Rojava heye. Ev êriş dê bibin sedeme komkujiyan.”
‘Çareseriya Sûriyeyê dê bandor li Tirkiyeyê jî bike’
Di berdewama axaftina xwe de Eda Onal anî ziman ku li gorî peymanên Netewên Yekbûyî divê gel pêşeroja xwe diyar bikin û wiha pê de çû: “Bênîqaş mafên gelê Kurd jî di bin parastina wan pêymanan de ne. Aştiyekê mayînde ne tenê navxweyî, divê tevahî erdnigariyê dê pêk bê. Çareseriyekê li Sûriyeyê dê bandor bide pêvajoya Tirkiyeyê jî. Divê tu kes li dijî êrişên ser gelê Kurd bêdeng nemîne. Ji bo statûya gelê Kurd bê naskirin, divê li qada navneteweyî gav bên avêtin. Em bang herkesî dikin ku divê dewleta Tirk diyalogê bi çeteyên selefî yên HTŞê re qût bike û gelê Kurd re ji bo aştiyekê mayînde bikevê nava têkiliyê. Mafê gelê Rojava bê naskirin dê ev biryar pêvajoya li Tirkiyeyê mayînde bike. Em bang hêzên navnetweyî dikin ku berpirsiyariya berpirsyariya xwe ya di vê hêlê de pêk bînin.”
‘Bi gelê Kurd re hevdîtîn bikin’
Di dawiyê daxuyaniyê de endama MYKê ya ÎHDê Eren Keskîn anî ziman ku gelê Kurd tenê aştiyê dixwazê û ev tişt gotin: “Hekê hûn bixwazin ji çeteyên cîhadîst re bibin cîran berdewam bikin. Lê heke hûn naxwazin, bi gelê Kurd re hevdîtîn pêk bînin. Ji ber ku gelê Kurd li Rojhilata Navîn gelê herî demokratîk e.”
Daxuyanî bi berzkirina dirûşma “Bijî Berxwedana Rojava” bi dawî bû.
