Lijneya Koordînasyona Bajêr a Amedê ya TMMOB ji bo piştgiriya berxwadana Rojava daxuyanî da û got: “Em li cem Rojava ya ku li dijî barbarî û hişmendiyên tarî rawestiyan e. Rojava ne tenê dilê Kurdan e, her wiha wijdana Rojhilata Navîn û mirovahiyê ye.”
Lijneya Koordînasyona Bajêr a Amedê ya Yekîtiya Odeyên Avahîsaz û Endezyarên Tirkiyeyê (TMMOB) a Amedê, li dijî êrîşên li ser Rojava li Parqa Roboskî ya Amedê da. Di daxuyaniya ku nûnerên rêxistinên civakî, partiyên siyasî û gelek kes tevlêbûn de pankarta “Rojava ne bi tenê ye” hate hildan.
Hevseroka Odeya Avahîsaz a Amedê Derman Ungur daxuyanî xwend. Derman Ungur di daxuyaniyê de got: “Dewletek ku bi sûcên li dijî mirovahiyê re hevpar e, ne
dikare aştiya civakî ava bike û ne jî di rûpelên dîrokê de bi rûmetî cih bigire. Dîrokê nîşan daye ku aştiyek birûmet, hevparî û azadiya gelê Kurd, rêya yekane aştiya domdar û aramiyê ye.”
Rêya aştiyê di Rojava de derbas dibe
Derman Ungur destnîşan kir rêxistinên pîşeyî naxwazin ku sedsalek din bi xwîn, şer û înkarê winda bikin û wiha domand: “Em li cem Rojava ya ku li dijî barbarî û hişmendiyên tarî rawestiyan e. Rojava ne tenê dilê Kurdan e, her wiha wijdana Rojhilata Navîn û mirovahiyê ye. Li Tirkiyeyê rêya aştiyê di Rojava de derbas dibe. Her piştgiriya bi Rojava re li Tirkiyeyê aştiyê xurt dike.”
Hevserok Derman Ungur di daxwazên xwe de bang li Amerîka û Ewropayê kir û got: “Aştiya ku hûn îro lê dijîn, bi berdêlên giranbiha yên gelê Kurd hatiye bidestxistin. Hezaran Kurd di şerê li dijî DAIŞê de jiyana xwe ji dest da. Bêdengî ne bêalîtiye; bêdengî hevpariya sûcê ye.”
‘Ev têkoşîn ya hemû mirovahiyê ye’
Derman Ungur wiha lê zêde kir: “Em wek gelê Kurd xwedî li aştiyê, edaletê û têkoşînê derdikevin û ew têkoşîne ne tenê ya Kurdan e; têkoşîna hemû mirovahiyê ye.”
Derman Ungur di dawiya daxuyaniyê de bang li her kesên ku li aliyê mirovahiyê, hiqûq û edaletê
ne kir ku piştgiriya berxwedana Rojava bikin.
Daxuyanî bi berzkirina dirûşmeyên “Jin, Jiyan, Azadî” û “Rojava Rojhilat e, Kurdistan yek welat e” bi dawî bû.
