Endamê Şaxa OHDê ya Stenbolê parêzer Îhsan Artuç diyar kir ku mafê her kesî heye qedera xwe tayîn bike û got: “Kurd jî li Rojava xwedî vî mafî ne û divê vî mafê xwe biparêzin. Gelê Kurd dest ji van destketiyên xwe bernade.”
Li aliyekî êrişên li ser Rojavayê Kurdistanê berdewam dikin û li aliyê din jî hevdîtin û civînên li ser çareserkirina pirsgirêkên li Sûriyeyê û Rojava tên kirin û didomin. Çeteyên HTŞê û SMOyê yên girêdayî Tirkiyeyê ji 6ê Çileyê ve êrişî Rojava dikin. Li dijî êrişan li Rojavayê seferberiya giştî hat ragihandin. Gelê Rojava ji biçûkan bigire heta kal û pîran ketiye pozîsyona parastin û berxwedanê û dibêjin ew ê nehêlin kes destkeftiyên wan têk bibe.
‘Em deng didin dengê Rojava’
Endamê Komeleya Hiqûqnasên Ji Bo Azadiyê (OHD) a Şaxa Stenbolê parêzer Îhsan Artuç têkildarî êrişên li ser Rojava axivî û diyar kir ku ew wekî parêzerên Kurd zilma li gelê Kurd tê kirin qebûl nakin û li dijî vê têdikoşin û wiha got: “Îro êriş li ser gelê Kurd tên kirin. Lê helbet hemû gel Kurd yek e. Gelê Kurd îro li her çar aliyê Kurdistanê li ser pêyan e. Em jî ji bo xwişk û birayên xwe yên li Rojava li ser pêyan e û piştgiriyê didin Rojava. Em deng didin dengê Rojava.”
‘Mafê her kesî heye ku qedera xwe tayîn bike’
Îhsan Artuç destnîşan kir ku li dijî şer peymanên navneteweyî ku hene tên binpêkirin û ev yek anî ziman: “Li ku derê be bila bibe, mafê her kesî, mafê her kesî heye ku ji bo siberoja xwe çarenûsa xwe diyar bike. Mafê her kesî heye qedera xwe tayîn bike. Kurd jî li Rojava xwedî vî mafî ne û divê vî mafê xwe biparêzin. Li Rojava bi keda gelek salan destketiyên gelê Kurd çêbûne. Divê gelê Kurd dest ji van destketiyên xwe bernede. Em jî bang li rayêdarên Tirk û dewletên din dikin mafên gelê Kurd nas bikin. Hûn neçar in jî nas bikin.”
