Rêxistinên mafên mirovan û hiqûqê yên li Îzmîrê, bal kişandin ser rewşa giran a girtiyê nexweş Enver Yanik û xwestin ku beriya encamên bêveger derkevin holê, demildest bê berdan.
Şaxa Komeleya Mafên Mirovan (ÎHD) a Îzmîrê, Komeleya Hiqûqnasên ji bo Azadiyê (OHD), Komeleya Hiqûqnasên Hemdem (ÇHD), Nûnertiya Weqfa Mafên Mirovan a Tirkiyeyê (TÎHV) a Îzmîrê û Komeleya Civaka Sivîl a di Pergala Înfaza Cezayê de (CÎSST), der barê rewşa girtiyê nexweş Enver Yanik ê ku li Girtîgeha Tîpa R a Menemenê tê ragirtin de daxuyaniyeke hevpar dan. Di daxuyaniya ku li avahiya ÎHDê hat dayîn de, malbata Enver Yanik û endama Lijneya Rêveber a Baroya Îzmîrê Zohre Dalkiran jî amade bûn.
Birînên giran û nexweşiyên kronîk
Hevberdevka Komîsyona Girtîgehan a ÎHDê Parêzer Nazli Turan, diyar kir ku Enver Yanik ji sala 1994an û vir ve gelek caran hatiye girtin û di grevên birçîbûnê yên sala 1996an de bi nexweşiya Wernîcke-Korsakoff ketiye. Turan anî ziman ku di operasyonên girtîgehan ên sala 1999an de Enver Yanik bi giranî birîndar bûye û got: “Hîn jî di gelek deverên laşê wî de perçeyên şarapnelê hene. Her wiha ji ber travmayên fizîkî yên giran û ji ber nexweşiyê av di mejiyê wî de kom dibe û ev dibe sedema ku encamên norolojîk ên mayînde lê peyda bibin.”
Zilm û tecrîd: Kursiyê biteker jê hatiye standin
Turan bal kişand ser binpêkirinên li girtîgehê û diyar kir ku Enver Yanik ji roja ku sewqî Menemenê hatiye kirin heta niha 21 kîlo dane. Turan destnîşan kir ku kursiyê biteker ê ku dabûn Yanik, bi hinceta “bila malbata te bikire” ji aliyê rêveberiyê ve jê hatiye standin û wiha axivî: “Girtina amûreke bingehîn ji destê girtiyekî ku nikare bi serê xwe tevbigere, li dijî rûmeta mirovahiyê ye. Enver Yanik her wiha di hucreyeke yekkesî de tê ragirtin. Nexweşekî ku her tim ji hişê xwe diçe û krîzan derbas dike, heke bi tena serê xwe bimîne, dibe ku di kêliyên krîtîk de nekaribe daxwaza alîkariyê bike. Ev yek rasterast li ser mafê jiyanê xetere ye.”
Banga ji bo konsera piştgiriyê
Hevjîna Enver Yanik, Şukriye Yanik jî di civînê de axivî û banga “mafê darizandina adil” kir. Yanik wiha got: “Daxwaza me ew e ku her kes beşdarî konsera piştgiriyê bibe ku wê 27ê Nîsanê li Navenda Çanda Nazim Hîkmet pêk were.”
‘Berpirsyar meqamên edlî û îdarî ne’
Di daxuyaniyê de hat destnîşankirin ku 3 meh in ji Saziya Tiba Edlî (ATK) bersiv nehatiye û hat daxuyandin ku heke Enver Yanik neyê berdan, berpirsyarên her encameke neyînî dê meqamên edlî û îdarî bin.
