Platfotma Saziyên Demokratîk a Amedê ji ber êrişên li ser Rojava daxuyanî da û got: “Keziyên jinên li Rojava dê bibe dawiya xeyalên dijminên gelê Kurd.”
Platforma Saziyên Demokratîk ya Amedê têkildarî êrişên li ser Rojavayê Kurdistanê daxuyanî dan çapemeniyê. Daxuyanî li qada Şêx Seîd hate dayîn. Hevserokên DEM Partiyê yên Amedê, Hevserokên DBPyê yên Amedê, hevserokên Şaredariyên navçeyên Amedê, OHD, Dayikên aştiyê, TJA û gelek nunerên saziyên sivîl û welatî tev li daxuyaniyê bûn. Destpêkê polisan bi hinceta qedexeyê destûr neda girseyê lê belê piştî israra dayîna daxuyaniyê dorpêça polîsan hat şikandin.
‘Berxwedana Kobanê di gewriya wan de diriya rêş e’
Daxuyaniyê Ruçem Vefa Elyakut xwend. Ruçem Vefa Elyakut di daxuyaniyê de destnîşan kir ku li Rojavayê Kurdistanê êriş tên kirin û got: “Ev bi rojan e li ser gelê me yê Rojava êriş û komkujiyên hovane û xwînxar didomin. Çeteyên DAİŞê li ser navê artêşa Suriyê êrişên xwe li ser hebûna gelê Kurd dikin. Ev êriş bi piştgirî û plansaziyê dewletên hegemonîk û dewletên herêmê tên kirin. Bi van êrişan dixwazin hemû deskeftiyên gelên Rojava û yekitiya gelan têk bibin û dijminatî di nav gelên li heremê de çêbikin. Em van êrişên hov şermezar dikin. Piştî êriş û dagirkeriya Helebê, Reqayê û Dera Zorê, îro jî êrişên xwe li ser Kobanê dikin û dixwazin tola serkeftin û lehengiya Kobanê hilînin. Berxwedana Kobanê bûye diriya rêş û di gewriya wan de maye. Lê belê çawa ku DAIŞ deh sal berê li ber deriyên Kobanê têk çû, wê îro jî ev êriş û komploya navdewletî û xeyalên çeteyan carek din têk biçe. Ev jî bi yekitî û piştgiriya gelê Kurd gengaz e.”
‘Keziya jinên Rojava dê bibe dawiya xeyalên wan’
Di berdewam daxuyaniya xwe de Ruçem Vefa Elyakut diyar kir ku dilê hemû jinên Kurd bi berxwederên jin û Kurdên li Rojava re diavêje û wiha got: “Ew keziya jinên Rojava bibe dawiya hemû xewn û xeyalên dijminên Kurd. Bi vê wesileyê em careke din êriş û komkujiya êrişkarên hov lanet dikin û dibêjin, Kurdên Rojava û Kobanê ne bi tenê ne. Bijî berxwedana Rojava.”
‘Kurd jiyana bê statû qebul nakin’
Parlamenterê DEM Partiyê yê Wanê Sînan Çîftyûrek bal kişand li ser berxwedana Kobanê û berxwedana gelê Kurd û ev tişt got: “Kobanê dûh azad bû, îro azad e û dê sibe jî azad be. Kî îro li Rojhilata Navîn de bê Kurdan siyasetê bimêşîne wê têk biçe û şaş e. Kurd êdî di Rojhilata Navîn de îro û şûn ve bê statû, federalîzm û bê xweserî jiyanê qebul nakin.”
Daxuyanî bi berzkirina dirûşmên “Bijî berxwedana Rojava” , “Yeke, yeke Kurdistan yeke” , “ Jin jiyan azadî” û “Şehît namirin” dawî bû.
