Li navçeyên Artûklû, Şemrex, Qoser û Nisêbînê li dijî êrişên li ser Rojava çalakî hatin lidarxistin û ji bo meşa sibê li Nisêbînê bê lidarxistin banga tevlibûnê hate kirin.
Li navçeyên Mêrdînê çalakiyên li dijî êrişên çeteyên HTŞê, DAIŞê û SMOyê yên girêdayî dewleta Tirk ên li ser Rojava tên lidarxistin didomin. Welatî li navçeyên Artûklû, Şemrex, Qoser û Nisêbînê li gelek taxan daketin kolanan û çalakî li dar xistin.
Artûklû
Welatiyên ku li navçeya Artûklûyê derketin kolanan dirûşma “Bijî berxwedana Rojava” berz kirin û çalakiya deng derxistinê li dar xistin.
Şemrex
Li navçeya Şemrexê jî li Qada Nûjiyan a navçeyê daxuyanî hate dayîn û dirûşmên “Bijî berxwedana Rojava” hate berzkirin. Hevserokê DEM Partiyê yê Şemrexê Mehmet Salîh Acar ê li vir axivî, êrişên li ser Rojava şermezar kirin û wiha got: “Xwişk û birayên me di bin zilmê de ne. Em jî weke gelê Kurd ji vir deng didin Rojava û berxwedana wan pîroz dikin.” Mehmet Salîh Acar bal kişand ser 5 zarokên ku li Kobanê ji ber sir û seqema zêde jiyana xwe ji dest dan û destnîşan kir ku divê her kes li hemberî zilma tê kirin dengê xwe bilind bikin. Mehmet Salîh Acar di berdewama axaftina xwe de wiha got: “Yek guleya ku li Kobanê gelê me dikeve li me jî dikeve em vê şermezar dikin û qebûl nakin.” Mehmet Salîh Acar da zanîn ku di 29ê Çileyê de li Şemrexê meşek tê lidarxistin û bang li gel kir ku her kes tev li meşê bibe û dengê xwe bilind bike. Mehmet Salîh Acar her wiha ji bo meşa ku sibê li Nisêbînê jî were li dar xistin banga tevlibûnê kir. Welatiyan dû re dirûşmên “Bijî berxwedana Rojava” û “Rojava Rojhilat e, Kurdistan yek welat e” beraz kirin.
Qoser
Li navçeya Qoserê jî welatiyên ku daketin qadan ji çar aliyê navçeyê fîşekên hewayî avêtin û çalakiyên xwe yên ji bo piştgiriya Rojava domandin. Welatiyên ku bi wesayîtan konvoy çêkirin kolan bi kolan geriyan û dirûşmên “Bijî berxwedana Rojava” berz kirin. Welatiyan tevî astengiya polîsan jî çalakiyên xwe domandin. Li aliyê din ciwanan li gelek taxan agir vêxistin, fîşekên hewayî avêtin û dirûşm berz kirin.
Nisêbîn
Li Nisêbînê jî çalakiyên deng derxistinê hatin lidarxistin û ji bo meşa sibê tax bi tax kolan bi kolan banga tevlibûnê hate kirin.
