Platforma Saziyên Demokratîk têkildarî êrişên qirkirinê yên li ser Rojavayê Kurdistanê bi tevlibûna hezaran kesan meşek li dar xist. Hevserokê Giştî yê DBPê Keskîn Bayindir ku piştî meşê axivî, diyar kir ku çawa keziyên jinan DAIŞ têk bir, dê HTŞê jî têk bibe.
Platforma Saziyên Demokratîk a Wanê ji bo balê bikşîne ser êrişên çeteyên HTŞ û SMOyê yên girêdayî Tirkiyeyê, ji Wan AVMê bi pankartên “Em rê nadin dagirkeran, bijî berxwedana Rojava” û “Xwedîderketina Rojava xwedîderketina mirovahiyê ye” dest bi meşê kir û girse heta Parka Aştiyê ya Mûsa Anter meşiya. Bi hezaran welatiyên Wanî ku li ber AVMê hatine cem hev, bi dirûşmên “Bijî berxwedana Rojava”, “Yek e yek e yek e gelê Kurd yek e” û “Rojava Rojhilat e Kurdistan yek welat e” nerazîbûnên xwe anîn ziman. Hevserokê Giştî yê Partiya Herêmên Demokratîk (DBP) Keskîn Bayindir, parlementerên DEM Partiyê yên Wanê, hevşaredarên bajarê mezin û navçeyan, rêveber û endamên partiyên siyasî, nûnerên saziyên sivîl, Dayikên Aştiyê, TJA û bi hezaran welatî di meşê de cih digirin.
Meş li pêşiya Wan AVMê dest pê kir û li Parka Aştiyê ya Mûsa Anter qediya. Piştî meşê daxuyanî hate dayîn. Hevseroka DEM Partiyê ya Wanê Gulşen Kurt axivî û bal kişand ser têkoşîna gelê Rojava û hemû Kurdistanê. Piştre Hevşaredara Bajarê Mezin a Wanê Neslihan Şedal ku qeyûm tayînî şûna wê hatiye kirin, axivî û diyar kir ku ew dê rê nedin êrişên li ser destkeftiyên Kurdan.
‘Em ê bêdeng nemînin’
Herî dawî Keskîn Bayindir mafê axaftinê wergirt û anî ziman ku Rojava ne tenê xelkê wir, lê hemû Kurdistanê eleqedar dike û ev tişt got: “Bawer bikin, em ê zîhniyeta HTŞê têk bibin. Çawa ku keziyên jinan DAIŞ têk bir, ew ê HTŞê û zîhniyeta ku piştgiriyê dide wê jî têk bibe. Bila cîhan bizanibe ku em dixwazin vê pirsgirêkê bi aştî û azadiyê çareser bikin. Lê yên ku dixwazin Kurdan bê statû bihêlin, bila bizanin ku em li vir in û em ê heta dawiyê li ber xwe bidin. Wan Kurdistan û Kurd parçe kirin, lê Rojava Kurd anî cem hev û ew kirin yek. Niha hemû Kurd ji bo Rojava şer dikin. HTŞ kuklaya ku ji hêla Tirkiyeyê ve hatiye tayînkirin e û xwedî zîhniyeta DAIŞê ye. Her roj, hêz didin wan û li ser televîzyonê pişta wan digirin. Kurdan dikujin, porê jinan dibirin, ji avahiyan diavêjin. Ciwanan dikujin. Ji me re dibêjin bêdeng bin. Em ê tu carî bêdeng nemînin.”
‘Biryar li Enqereyê tê dayîn’
Keskîn Bayindir destnîşan kir ku ew dixwazin Kurdên li Rojava ji holê rakin û wiha dawî kir: “Biryara qirkirinê li dijî Kurdan li Enqerê tê dayîn, ne li Şamê. Her roj dibêjin ‘Kurd birayên me ne’. Ger hûn ê her roj vê yekê li birayên xwe bikin, em vê biratiya we ya bêexlaq qebûl nakin. Rêberê Gelê Kurd Abdullah Ocalan got ku rizgariya Kurdan di têkoşîn û yekîtiyê de ye. Wî her wiha hişyarî da Tirkiyeyê û ji wan xwest ku piştgiriyê nedin HTŞê. Birêz Ocalan bang kir ku pirsgirêkên li Sûriyeyê bi awayekî aştiyane werin çareserkirin. Ocalan got ku Colanî DAIŞ e û nikare Sûriyeyê birêve bibe. Rojava dê xweser bimîne û em ê heta dawiyê ji bo vê yekê şer bikin.”
