Çapemeniya Ereb vê hefteyên rewşa li Sûriye û gengaşiya di navbera Îran û DYAyê de girte rojeva xwe. Di çapemeniyê de hate daxuyandin ku DAIŞ bi şêwazeke nû li Sûriyê bi bandor dibe û ev yek jî encama berjewendiyên herêmî û kûrevî ne. Her wiha hate daxuyandin ku vejîna DAIŞê ne bi rêbazên qlasîk bi awayek pergalî vesaz dibe.
Çapemeniya Erebî vê hefteyê tevgera çeteyên DAIŞê li Sûriyeyê, rageşiya Amerîka û Îran û rewşa Ewropayê kir girte rojeva xwe. Rojnameya El Nehar der barê vegera çeteyên DAIŞê de nivîsî û cih da vê pênaseyê: “Tiştê ku diqewime ne vejîneke leşkerî ya kevneşopî ya DAIŞê ye lê belê ji nû ve bicihkirinek e ku ji parçebûna pergala ewlehiyê ya herêmî sûdê werdigire.” Rojnameyê destnîşan kir ku DAIŞ derbasî stratejiyeke windakirin û têkbirina baweriyê bi hikumeta demkî ya Sûriyeyê bûye û ji qelsiya dosyaya zindanên li Bakur û Rojhilatê Sûriyeyê, nemaze piştî revîna girtiyan ji navendên ragirtinê yên li Heseke û Reqayê sûdê werdigire.
‘Vejîna DAIŞê encama berjewendiyên herêmî û kûrevî ye’
Li gorî rojnameyê vegera DAIŞê ne encama karekî yekalî yan biryareke rasterast ji aliyê yek kesî ve ye û wiha domand: “Lê di encama lihevhatina berjewendiyên tevlihev ên aliyên herêmî û navneteweyî de derketiye holê. Hikumeta demkî ya Sûriyeyê ji nû ve girîngiya gefa cîhadîst sûd wergirtiye da ku xwe wek hevkareke bingehîn ji bo civaka navneteweyî di ‘şerê li dijî terorê’ de destnîşan bike. Lewre kanalên ragihandinê yên siyasî û ewlehiyê ji nû ve ava bike, beşdarî Koalîsyona Navneteweyî bibe û zexta têkildarî têkiliyên xwe yên berê û yên bi komên ku wekî tundrew hatine destnîşankirin, sivik bike.”
‘Armanca Tirkiyê ne DAIŞ lê Kurd in’
Rojnameyê diyar kir ku Washington vegera DAIŞê wekî ‘gefek dikare were birêvebirin’ dibîne û ev tişt gotin: “Armanca pêşîn a Tirkiyeyê jî lawazkirina Rêveberiya Xweser e. Di encamê de şaneyên DAIŞê bi awayekî demkî çalak bûn. Her wiha xetereya Kurdan ji xeteriya cîhadîstan mezintir dibîne. Berjewendiyan DAIŞ di pevçûnek berfireh de aniye asta amûrek fonksiyonel. Naxwazin DAIŞ bi ser bikeve an bi temamî têk biçe, lê dixwazin wekî amûreke zextê di hevsengiyên ji nû ve xêzkirina bandorê de li Sûriye û herêmê de bimîne.”
‘Li Libnanê şêr li Golanê kîvroşk’
Rojnameya El Quds El Erebî ya li Londonê weşanê dike jî diyar kir ku bûyerên dawîn ên li Bakur Rojhilatê Sûriyeyê bandorên cidî li ser rewşa Kurdan û Sûriyeyê dikin. Rojnameyê destnîşan kir ku hikûmeta demkî ya Sûriyeyê li bakur li dijî Kurdan helwesteke tund nîşan dide, di heman demê de li başûr li hember Îsraîlê aram û bêdeng e. Gotina, ‘Li Libnanê şêr e û li Golanê kîvroşk e’ tîne bîra mirov. Sûdmenda herî mezin a vê rastiyê Îsraîl e.”
Stratejiya DYAyê ya Îranê ne zelal e
Rojnameya Libnanê El Exbar li ser rageşiya DYAyê ya li dijî Îranê nivîsî û diyar kir ku Washington tevî temamkirina amadekariya xwe ya leşkerî jî li Rojhilata Navîn, bi polîtîkayeke ‘nezelaliya stratejîk’ tev digere.
Rojnameyê destnîşan kir ku daxuyaniyên Trump ku ji aliyekî ve gefên leşkerî dixwe û ji aliyê din ve banga dan û standinan dike, nîşan didin ku bêyî şer dixwaze zextê li Tehranê bike. Rojnameyê cih da van nirxandinan: “Îran her êrişekê, heta êrişeke sînordar jî be, wek ‘ragihandina şerekî giştî’ dibîne û dê bi hemû hêza xwe bersiv bide. Ev yek jî derî li ber aloziyeke ku dikare ji kontrolê derkeve, vedike.”
Girêdana bi DYAyê re nahêla Ewropa bibe hêz
Rojnameya El Xelîc a Îmaratê bal kişand ser siberoja têkiliyên Ewropa û DYAyê û pirsa, “Gelo Ewropa dikare serbixwe be?” kir. Rojnameyê nivîsî ku şerê li Ukraynayê lawaziya hêza parastinê ya serbixwe ya Ewropayê aşkera kir. Rojnameyê diyar kir ku bangên ji bo ‘serxwebûna stratejîk’ a Ewropayê zêde dibin, lê ji ber nakokiyên navxweyî û girêdayîbûna kûr a bi sîwana ewlehiyê ya DYAyê ve, ev hewldan qels dimînin.
