Balyozê Amerîkayê yê Tirkiyeyê û Nûnerê Tabet ê Sûriyeyê Tom Barrack ragihand ku ew naxwazin pergala Rojava ya xweser û demokratîk di nava qebîle û eşîrên Ereb de bê cibicîkirin.
Enstîtuya Milken a li Eyaleta Calîforniyayê ya Amerîkayê li ser rewşa dawî ya li Sûriyeyê bi Sefîrê Amerîkayê yê Enqereyê û Nûnerê Taybet ê Amerîkayê bo Sûriyeyê Tom Barrack re hevpeyvîn kir. Di hevpeyvînê de Tom Barack li xwe mikûr tê û gotiye ew naxwazin pergala Rojava ya xweser û demokratîk li Sûriyeyê serwer bibe.
‘Em naxwazin çanda Rojava bandorê li eşîrên ereb bike’
Tom Barrack di hevpeyvîna Enstîtuya Milken a li Calîforniyayê de diyar kir ku pirsgirêka sereke ew e ku Rojava xwestiye modela xwe li ser eşîr û pêkhateyan ferz bike ku xwedî dîrok û çandeke taybet a bi hezarên salan in.
Tom Barrack anî ziman ku wan xêz li dora eşîr û herêmên wisa kişandiye da ku ji bo geşedanên wisa bandor nebin.
Barrack: Sykes-Picot naye guhertin
Tom Barrack ji bo statuya nexşeya Rojhilata Navîn jî diyar kir ku ew naxwazin Sykes-Picot bê guhertin. Barrack destnîşan kir ku di nava vê sedsalê de welatên rojavayî 92 caran hewl dane ku li heremê rejîmê biguhêrine, lê bi ser neketine.
‘Serdema Trump pergala li heremê diparêze’
Barrack da zanîn ku stratejiya nû ya Amerîkayê di serdema Trump de ev e ku “rê bide herêm wek xwe be” û rê li ber ferzkirinên ji derve bigire û di cihê vê de derfetên aboriyê bê avakirin.
Barrack di ciheke hevpeyvînê de jî diyar dike ku serdema nexşeyên kevn têk çûye û divê Rojhilata Navîn ji nakokiyên eşîrî derkeve û berê xwe bide teknolojiya pêşketî.
