Têkildarî êrişên li dijî ESPê û saziyên sivîl li ber Edliyeya Stenbolê daxuyanî hate dayîn. Di daxuyaniyê de hate destnîşan kirin ku çawa ku berê êrişên rejîma qesrê pûç kirin dê îro jî pûç bikin û diyar kirin ku dê têkoşîn berdewam bike.
Di 3ê Sibatê de li dijî Partiya Sosyalîst a Bindestan (ESP), Meclisên Jinên Sosyalîst (SKM), Federasyona Komeleyên Ciwanên Sosyalîst (SGDF), DÎSK/LÎMÎTER-ÎŞ, Polen Ekolojî û BEKSAVê operasyonekê siyasî pêk hat. Polisan 22 bajaran bi ser gelek malan de girt Hevserokê Giştî yê Partiya Sosyalîst a Bindestan (ESP) Murat Çepnî, nûçegihanên Ajansa Nûçeyan a Etkînê (ETHA), endamên Meclisên Jinên Sosyalîst (SKM), Federasyona Komeleyên Ciwanên Sosyalîst (SGDF), DÎSK/LÎMÎTER-ÎŞ, Polen Ekolojî û BEKSAVê jî di nav de 95 kes binçavkiribûn. 55 kesên binçavkirî îro sewqî Edliyeya Stenbolê hatibûn kirin. Li ser vê yekê ESPê îro bang kir û her kes vexwend ber deriyê Edliyeya Stenbolê. Parlamenterên DEM Partiyê, endam û rêveberên partiyên siyasî û saziyên sivîl ên civakî di nav de gelek kes li ber edliyeyê kom bûn û li vir daxuyanî dan. Di daxuyaniyê de pankarta “Hevî em in, li vir in, li ser pêyan e” hat vekirin û dirûşmeya “Bijî piştgiriya şoreşgerî” hat berzkirin.
‘Komplo dê pûç bibe em ê serbikevin’
Di daxuyaniyê de ewilî endamê ESPê Sonat Çîçek axivî. Sonat Çîçek diyar kir ku ESP ji damezrandina xwe ve li gel jin, ciwan û gelê Kurd sekiniye û got: “Em wekî ESPê ne biyaniyê êrişan in. Hevserokê me Mûrat Çepnî û gelek hevalên me hatin binçavkirin. Êriş ji bo şikandina hêviyê pêk tên. Me çawa ku berê êrişên rejîma qesrê bin pê kir, em ê îro jî bin pê bikin. ESP li cem gelê Kurd e. Em ê ji niha şunde jî li cem gelê Kurd bisekinin. Komplo dê pûç bibe. Em ê serbikevin.”
‘Faşîzm nikarê me têk bibe’
Paşê jî parlamentera DEM Partiyê ya Stenbolê Çîçek Otlû axivî û destnîşan kir ku AKP kesên li dijî xwe qebûl nake û got: “Lê em dibêjin faşîzm nikarê me têk bibe. Em ê bi gotina ‘Bijî şoreş’ di nava têkoşînê de bin.”
‘Heta dawiyê dê têkoşîna me berdewam bike’
Di dawiyê de jî Hevseroka DEM Partiyê ya Stenbolê Arîfe Çinar axivî. Arîfe Çinar anî ziman ku berî çend rojan bi hincetên derew hevalên wan hatine binçavkirin û ev tişt anî ziman: “Têkoşîna me têkoşîna rûmetê ye. Îro li ser Rojava êriş hene. Em jî li cem gelê Rojava disekinin û heta dawiyê jî em ê li cem wan bin. Heta dawiyê dê têkoşîna me berdewam bike.”
Pişti axaftinan daxuyanî bi dawî bû.
