Hat hînbûn ku Rêberê Gelê Kurd Abdullah Ocalan di rojên krîtîk de dema şerê li Rojava giran bûbû ketiye dewrê, peyamên girîng û hişyarî ji HSDê re, ji dewletê re û ji siyasetmedarên Başûrê Kurdistanê re şandine.
Hêzên Sûriyeya Demokratîk (HSD), peymana ku bi Hikûmeta Demkî ya Sûriyeyê re çêkiribû di 30ê Çileyê de bi raya giştî re parve kir. Piştî peymanê agirbest hat ragihandin û tevger li qadê jî zêde bû. Şandeyên girêdayî Şamê hem çûn Kobanê, hem jî çûn Hesekê û Qamişloyê. HSDê ji bo Walîtiya Hesekê Nureddîn Îsa Ahmed diyar kir. Xebatên entegrasyonê jî berdewam dikin.
Şandeya Îmraliyê ya Partiya Wekhevî û Demokrasiyê ya Gelan (DEM Partî) Mithat Sancar û Pervîn Buldan, Hevserokê Giştî Tuncer Bakirhan daxuyandin ku Rêberê Gelê Kurd Abdullah Ocalan di pêkanîna vê peymanê de roleke mezin lîstiye.
Abdullah Ocalan hişyarî dan?
Ajansa Mezopotamyayê (MA) ser barê mijarê de bi çavkaniyên siyasî yên ku pêvajoya ragihandinê ya li Girava Îmraliyê dizanin re, axivî. Agahiyên ku DEM Partiyan parve kiribûn hatin piştrastkirin û hat zanîn ku Abdullah Ocalan di vê pêvajoyê de hewldanekî mezin daye.
Li gorî agahiyên hatine bi dest xistin; Ocalan di pêvajoya şer de hem ji HSDê re, hem ji aktorên siyasî yên Kurd ên li Herêma Federe ya Kurdistanê, hem jî ji DEM Partî û rayedarên dewletê re peyam şandiye.
Abdullah Ocalan, piştî destpêkirina êrişên li ser Helebê hişyarî da ku heke pirsgirêk neyê çareserkirin û êriş berdewam bikin, dibe ku tabloyeke pir bixwîn derkeve holê. Wî diyar kir ku ev pêvajo xwedî dînamîkekî xeternak e ku dikare sedsala li pêşiya me veguherîne şerekî Kurd-Tirk û Ereban.
Abdullah Ocalan peyam da HSDê ku ev rewş tenê bi rêya muzakere û diyalogê dikare were sekinandin. Herwiha hat zanîn ku wî peyam şandiye ku heke rêveberiya Şamê berê xwe bide demokrasiyê, hebûna Kurdan bi aşkerayî qebûl bike û mafê temsîliyeta siyasî ya Kurdan nas bike, HSD jî dikare bikeve “pêvajoyeke muzakereyê ya demokratîk”.
Peyama ji bo hemû aliyan
Hat diyarkirin ku Abdullah Ocalan ne tenê ji HSDê re, lê ji hêzên siyasî yên Kurd (KCK, siyasetmedarên Herêma Federe ya Kurdistanê, DEM Partî…) re jî peyam şandiye. Di peyaman de hişyarî daye ku xeter pir mezin e, ji ber vê xwestiye ku li ser bingeha yekitiya demokratîk xwedî li Rojava derkevin.
Peyama ji dewletê re şand…
Herwiha Abdullah Ocalan di vê pêvajoyê de hişyarî dayê, dewlet û desthilatdarî ye. Li gorî çavkaniyan; Abdullah Ocalan ji dewlet û desthilatdariyê re peyama “Nebin parçeyekî plana ku tasfiyekirina Kurdan armanc dike” şand. Wî hişyarî da ku beşdarbûna di êrişan de dê bibe sedema şikestinên mezin û encamên giran û neyînî. Ji dewlet/desthilatdariyê re peyama “roleke pozîtîf bilîzin” şandiye.
Peyman bi îradeya Abdullah Ocalan pêk hat
Peymana ku di 30ê Çileyê de hat aşkerakirin, bi piştgirî û îradeya tam a Abdullah Ocalan ket meriyetê. Hat zanîn ku Serokê Giştî yê PDKê Mesûd Barzanî û Serokê YNKê Bafil Talabanî jî di vê pêvajoyê de rolekî girîng lîstine. Her du serkirdeyan jî di mijara pêkanîna peymanê de alî teşwîq kirin.
