Şêniyên bajarên Hesekê û Dirbêsiyê meşên girseyî li dar xistin û hate xwestin ku mafên gelê Kurd di makezagonê de demildest bê misogerkirin. Di axaftinan de hate destnîşankirin ku dê destkeftî bên parastin.
Li bajarên Hesekê û Dirbêsibê bi armanca balkişandina ser makezagona nû ya Sûriyê û misogerkirina mafên Kurdan di makezagonê de meş hatin li darxistin. Meşê li Çerxerêya Kevokê ya li Taxa Til Hecer dest pê kir û heta Çerxerêya Şehîd Serhed a li Taxa Muftî berdewam kir. Di meşê de pankartên, “Zimanê me nasnameya me ye”, “Bijî berxwedana Rojava” û “Divê mafên me di destûrê de werin misogerkirin” û “Yekîneyên Parastina Jinan îradeya azadiya jinan temsîl dikin” hatin vekirin. Li ser navê girseya durişmên, “Bijî berxwedana Rojava”, “Rojava Rojhilat e Kurdistan yek welat e” û “Bijî yekîtiya gelê Kurd” avêtin Hevserokê Rêxistina Partiya Yekitiya Demokratîk a Hesekê Ferhan Dawûd axivî. Dawûd wiha got: “Îro roja piştgiriya berxwedana Rojava ye, û ji vir em mafên xwe yên rewa û derxistina Qanûna Parastina Kurdan dixwazin.”
‘Cîhan ji berxwedana me re deyndar e’
Dawûd destnîşan kir ku cîhan deyndarê fedakarî û berxwedana gelê Kurd e û berpirsiyariyeke exlaqî û siyasî dikeve ser milê cîhanê ku piştgiriya mafên gelan ji bo jiyaneke demokratîk a bi rûmet û bike. Ferhan Dawûd wiha domand: “Rojava ne bi tenê ye; hemû gelê Kurd li kêleka Rojava ye û piştgiriyê dide berxwedana wê ya adil.” Ji rêveberên Kongra Star Rûken Ehmed jî axivî û destnîşan kir ku meha Sibatê meha salvegera Komploya Navneteweyî ya li dijî Rêber Gelê Kurd Abdullah Ocalan e û diyar kir ku ev komplo di serî de li dijî îrade û azadiya jinan bûye. Meş bi diruşmeya, “Bijî berxwedana Rojava!” bi dawî bû.
‘Meşa me bi şoreşê dest pê kir’
Li bajarê Dirbêsiyê jî bi beşdariya bi sedan kesî meş hate lidarxistin. Meşê li Qada Jina Azad dest pê kir, li Qada Şehîdan dawî bû. Li vir beşdaran al û sembolên Kurdistanî, li gel pankartên, “Divê mafên me di destûrê de werin misogerkirin” û “Zimanê me nasnameya me ye” vekirin. Endamê Însiyatîfa Gel a Dirbêsiyê Silêman axivî û berxwedana gel silav kir. Silêman wiha got: “Meşa gelê me bi destpêkirina Şoreşa 19ê Tîrmehê li Rojava dest pê kir, ku ji aliyê jin û ciwanan ve tê birêvebirin û têkoşîna YPG/YPJê destkeftiyên mezin bi xwîna şehîdan hatine bidestxistin.”
Li ser navê Tevgera Jinan a Rojava û Kongra Star, Rexda Şihada daxuyaniyek xwend û diyar kir ku têkoşîna gel li dijî hemû proje û polîtîkayên ku maf û hebûna gelê Kurd hedef digirin, pêk hatiye. Rexda diyar kir ku gelê Kurd ji bo azadî û rûmetê fedakariyên mezin kirine û dest ji destkeftiyên xwe bernadin. Meş bi diruşmeyan bi dawî bû.
