Yekîneyên Şaredariya Kobanê piştî bicihanîna pêwistiyên Peymana 29ê Çile li navçeya Şêxlerê dest bi kar kir. Di çarçoveya xebatan de Şaredariya Şêxlerê cardin hate aktîfkirin û dest bi karên xizmetgûzariyê kir.
Pêkanîna Peymana 29ê Çileyê ku di navbera Hikumeta Demkî ya Sûriyê û Rêveberiya Xweser de pêk hatibû, berdewam dike. Piştî diyarkirina xetên di navbera Sûriyê û herêmên Kurdan de xebatên xizmetgûzariyê cardin destpêkirin. Hefteya borî Hêzên Ewlehiya Hundirîn li noqteyên di navbera her du aliyan de hatine diyarkirin cih bû û dest bi karûbarên ewlehiya Şêxlerê kir. Yekîneyên girêdayî Hêzên Ewlehiyê Hundir a Kobanê li bajar xebatên venêrînê meşandin û ewlehiya Şêxlerê ji nûve saz kir û aramî li bajar serwer kir.
Şaredariya Şêxlerê dest bi kar kir
Şaredariya Gel a Şêxlerê ku di encama êrişan de ji rewşa xizmet dayînê derketi bû. Piştî pêkanîna ewlehiyê Şaredariya Gel a Kobanê çû bajaroka Şêxlerê ya bi ser bajarê Qinê ve û şaredarî cardin xiste xizmeta gel. Şaredariyê Kobanê pêşiyê li avahiyên fermî, rê û kuçeyên bajar xebatên paqijî û restorekirinê meşandin û piştre jî bi xebatkarên Şaredariya Gel a Şêxlerê re hate cem hev. Bi vesazkirina rayedar û xebatkaran şaredariyê dest bi kar kir.
Zirarên çêbûyîn ji holê hatin rakirin
Hevşaredarê Kobana Fewaz Ehmed ku têkildarî mijarê agahî dan ANHAyê diyar kir ku Şaredariya Kobanê berê xwe daye navçeya Şêxlerê da ku şaredariya bajarkê bixe xizmeta gel. Ehmed wiha got: “Ev demek e ji ber şerê li herêmê şaredariya li navçeya Şêxlerê ji xizmetê derketibû. Lê îro me vesazkirinên pêwist kirin. Şaredarî û deverên zirar dîtîn, cih û riyên hatine hilweşandin ji nûve hatin restorekirin. Her wiha paqijiya bajar jî hate kirin.” Ehmed anî ziman ku Şaredariya Şêxlerê ji nûve ketiye xizmeta gel. Xebatkarê Şaredariya Kobanê Omar Heçikê jî anî ziman ku sererastkirinên pêwist kirine û şaredariyê cardin dest bi kar kiriye.
