Hevşaredarê Bajarê Mezin ê Wanê Abdullah Zeydan, di civîna gel a li Mûşê de li dijî propagandaya reş a der barê pêvajoyê de axivî û got: “Guh nedin van gotinên beredayî. Em têkoşîneke pir mezintir dimeşînin. Em ê girîngiya gavên ku Birêz Ocalan avêtine, di salên pêş de fêm bikin.”
Platforma Saziyên Demokratîk a Mûşê, di çarçoveya civînên “Aştî û Civaka Demokratîk” de bi gelê Mûşê re hat cem hev. Civîn bi beşdariya Hevşaredarê Bajarê Mezin ê Wanê Abdullah Zeydan ku qayim li şûna wî hatibû tayînkirin, li Navenda Ciwanan a Bursa-Mûşê pêk hat. Tevî pêkhateyên platformê, nûnerên partiyên siyasî, saziyên demokratîk û gelek welatî beşdarî civînê bûn.
‘Helwesta Ocalan û gel komplo vala derxist’
Civînê bi rêzgirtinê dest pê kir û bi axaftinan berdewam kir. Abdullah Zeydan di axaftina xwe de hêvî kir ku cejn û Newroz ji bo Kurdan bibe destpêkeke nû. Zeydan destnîşan kir ku gel bi têkoşîna xwe li her qadê xwedî li Tevgera Azadiyê û Rêberê Gelê Kurd Abdullah Ocalan derketiye û wiha got: “Wekî hûn dizanin meha Sibatê ji bo me meheke girîng e. Rojên borî salvegera komploya navneteweyî ya 15ê Sibatê bû. Armanca vê komployê ji ya ku xuya dike pir berfirahtir bû. Dixwestin siyaseta Kurd û têkoşîna wê biqedînin; dixwestin di navbera Kurd û Tirkan de şerekî mezin derxin. Lê bi helwesta Birêz Ocalan û gel, ev armanc hat pûçkirin.”
‘Hemû destkeftiyên me bi saya têkoşîna me ne’
Zeydan diyar kir ku ji ber polîtîkayên zextê, Kurd anîne wê astê ku civakbûn û kultura xwe winda bikin, lê bi têkoşînê re Kurdan careke din hebûna xwe keşf kiriye. Zeydan wiha berdewam kir: “Vê tevgerê rê li ber windabûna civakbûn û kevneşopiya Kurdan girt. Kurdan di dirêjahiya dîrokê de tevî zexta desthilatdariyê, li dijî îxanetê jî têkoşîn da. Ger hişmendiya eşîrtî û malbatparêziyê berdewam bikira, ev têkoşîn nedihat meşandin. Yên ku digotin ‘hêza 4 kesan nemaye ku werin cem hev’, îro dibînin ku gel xwedî li rêberê xwe derdikeve. Me çi kiribe, bi berdêl û têkoşîna xwe kiriye.”
‘Divê nasnameya Kurdan di qanûn de bê nasîn’
Zeydan destnîşan kir ku tifaqa Kurd û Tirkan ji bo her du gelan û gelê Ereb rizgarî ye. Zeydan di der barê pêvajoyê de ev xal rêz kirin: “Em ê di pêvajoya li pêş me de bibînin ku bi gaveke Birêz Ocalan rê li ber çi tê girtin û deriyên çi vedibin. Em ê bandora vê li Bakur, Rojava û heta li Rojhilat jî bibînin. Divê rê li ber sepana qeyûman bê girtin û nasnameya Kurdan bi qanûnî bê qebûlkirin. Hevalên me di zindanan de ne, girtiyên nexweş hene. Divê ji bo perwerdehiya bi zimanê dayikê gav bên avêtin.”
Banga yekîtiya Kurdan û bersiva li dijî propagandaya reş
Zeydan li dijî îdîayên ku dibêjin “hûn ji bo Ereban têkoşînê didin” bertek nîşan da û got: “Bê guman em ê berê mafê xwe, piştre jî mafê gelê Ereb biparêzin. Cudahiya me ji faşîstan ev e.” Her wiha Zeydan bal kişand ser hewildanên reşkirinê yên li ser navê Selahattin Demirtaş û Mazlum Ebdî û ev tişt gotin: “Dixwazin bi navê Selahattin Demirtaş an Mazlum Ebdî, Birêz Ocalan bikin hedef. Lê helwesta Birêz Ocalan û ya Demirtaş ev lîstik xera kirin. Dibêjin Mazlum Ebdî li dijî Ocalan e; ev derew e. Guh nedin van gotinên serserî, em têkoşîneke pir mezintir dimeşînin.”
Giringiya têkoşîna jinê
Aktîvîsta Tevgera Jinên Azad (TJA) Zekîye İlbasan jî bal kişand ser xeta azadiya jinê û got: “Rêyekê werê hûnandin ku kes nikaribe dest dirêjî por û bedena jinên Kurd û zarokên Kurd bike. Divê her hevalek bi hişmendiya parastina paradîgmayê, derdora xwe ronî bike û vê têkoşînê mezin bike.”
