Şandeyeke Kordînasyona Şengalê ya Pêkhate û Hêzên Niştimanî, li Bexdayê bi berpirsên siyasî re hevdîtinên girîng pêk anîn. Di hevdîtinan de hat destnîşankirin ku ji bo çareserkirina pirsgirêkan divê zimanê diyalogê li pêş be û hêzên Êzîdî di nav sîstema parastina Iraqê de cihê xwe bigirin.
Şandeyek ji Koordînasyona Şengalê ya Pêkhate û Hêzên Niştimanî (Tensîq) li ser planên li dijî îradeya gelê Êzidî bi armanca hevdîtina çû Bexdayê. Serokê Koordînasyona Şengalê ya Pêkhate û Hêzên Niştimanî Dawid Cindî, li gel endamên Koordînasyonê Hisên Hecî û Dexîl Murad, di navbera 23 û 25’ê Sibatê de li paytexta Iraqê Bexdayê hevdîtin kirin. Şandeyê di serî de bi Qasim El-Erecî, Qeys El Xezelî û gelek berpirs û aliyên siyasî re hevdîtin pêkanîn.
‘Divê hêzên leşkerî bi nasnameya xwe cih bigirin’
Li gorî agahiyên ku ji aliyê Nivîsgeha Ragihandinê ya Serokê Koordînasyona Şengalê ve hatine parvekirin, mijara sereke ya hevdîtinan rewşa dawî ya Şengalê û pêşeroja hêzên parastinê yên Êzîdî bû.
Şandeyê dosyeya têkelkirina hêzên Êzîdî bi nasnameya xwe, di nav sîstema leşkerî ya Iraqê de bi berfirehî bi rayedaran re hate nîqaşkirin. Her wiha hata diyarkirin ku di hevdîtinan de bal hatiye kişandina li ser girîngiya aramiya herêmê û wiha hate gotin: “Di şûna bijartekên leşkerî û aloziyan de, divê zimanê diyalogê bibe bingeha çareseriyê. Pêwîst e ruhê niştimanî li herêmê serdest bibe da ku pêkhateyên Şengalê di ewlehiyê de bijîn.”
