Îzmîr – Serokê Rûmetê yê ÎHDê Akin Bîrdal derbarê kuştina Hevserokê ÎHDa Îzmîrê yê berê parêzer Alî Aydin ev tişt anî ziman: “Heta em bersiva pirsên xwe peyda nekin, em dev ji pirsên xwe bernadin.”
Hevserokê berê yê Şaxa Komeleya Mafên Mirovan (ÎHD) a Îzmîrê parêzer Alî Aydin li herêma Evka-2yê ya Çîgliyê ya Îzmîrê kuştî hat dîtin. Di derheqê dosyaya lêpirsînê de biryara nepeniyê hate dayîn û pêvajoya otopsiyê hîn didome. Serokê Rûmetê yê ÎHDê Akin Bîrdal derbarê kuştina Alî Aydin de ji Ajansa Welat re axivî û got: “Emrê xwe bi têkoşîna mafê mirovan re bihorand. Tim ji bo dinyayeke şênber li ber xwe da. Em gelekî xemgîn in û peyv têra îfadekirina xemginiya me nakin. Hevalê me Ali Aydin welatparêzekî samîmî bû. Derbarê bûyêrê de tije pirs hene di serê me de, heta bi temamî em bersiva van pirsan peyda kir em ê dev ji pirsên xwe bernedin.”
Daxuyaniya ÎHDê
Derbarê kuştina Alî Aydin de ÎHDê daxuyanî da û got: “Em gelekî xemgîn in, hevalê me yê ku hevserokê berê yê şaxa ÎHDê yê Îzmîrê û nûnerê herêma Egeyê yê ÎHDê Alî Aydin, îro bi erişeke jiyana xwe ji dest da. Bûyer ji aliyê parêzerên ku endamê ÎHDê û Baroya Îzmîrê ve tê şopandin. Piştî ku hûrgilî hatine zelalkirin, agahiyên pêwîst li gorî rêgezên veşartina dosyaya lêpirsînê dê bi raya giştî re bêne parvekirin.”
Gumanbar hat binçavkirin
Midûriyeta Polîsan a Îzmîrê derbarê kuştina Aydin de ev tişt parve kir: “14ê çileya 2026an saetên serê sibê de li navçeya Çîgiliyê, li herêma çiyayî ya Evka-2yê termê zilamekî hate dîtin. Hate tespîtkirin ku maktulê bûyerê A.A, (sala 1957an ji dayik bûye, mamosteyê teqawidbûyî ye û parêzer e.) Li gorî xebatên derbarê zelalkirina bûyerê de, gumanbarê bûyerê weke M.D.E (ji dayîkbûn 1996) hatiye tesbîtkirin û demeke kin de gumanbar hatiye binçavkirin. Gumanbar li xwe mikur hatiye û gotiye di bin tesîra tiryakê de min A.A kuşt.”
