Sêrt – Hevserokê DBPê yê Sêrtê Mustafa Dayan û hevserokê DEM Partî yê Sêrtê Eşref Tekîn anîn ziman ku çalakiyên li dijî tayinkirina qeyûm hatinê destpêkirin wê bidomîn û bang li welatiyên Sêrtê kirin ku tevlî çalakiyan bibin.
Şêredariya Sêrtê ku Partiya Wekhevî û Demokrasiyê ya Gelan (DEM Partî) di hilbijartinên herêmî de bi rêjeya ji sedî 49 dengan bi dest xistibû, di 29ê çileyê de ji aliyê Wezareta Karên Navxweyî yê Tirk ve qeyûm hat tayînkirin. Piştî tayinkirina qeyûm Hevşeredar Sofya Alagaş û Mehmet Kaysî ji peywîrê hatin dûrxistin û li şûna wan Waliyê Sêrtê Kemal Kizilkaya peywîrdar kirin. Bertek û çalakiyên li dijî tayinkirina qeyûm di roja 5an de jî berdewam dike. Hevşeredarên şûna wan qeyûm hatiyê tayinkirin, parlamenterên DEM Partiyê û welatiyên Sêrtê li dijî tayinkirina qeyûm çalakiya meşê li dardixînin û li ber avahiya şeredariyê rûdinên. Çalakiyên li dijî qeyûm bi şev jî berdewam dike.
Hevserokê Partiya Herêmên Demokratîk (DBP) a Sêrtê Mustafa Dayan û Hevserokê Partiya Wekhevî û Demokrasiyê ya Gelan (DEM Partî) a Sêrtê Eşref Tekîn, tekildarî çalakiyên li dijî tayinkirina qeyûm a li ser şeredariyê bi lêv kirin ku çalakiyên wan wê bidomin û bang li gelê Sêrtê kirin ku xwedî li vîna xwe derbikevin.
‘Armanc dikin destkeftiyên gel tune bikin’
Mustafa Dayan anî ziman ku tayinkirina qeyûm a li ser şeredariyê yek jî encama hiqûqa dijminatiyê ya li dijî gelê kurd e û wiha axivî: “Armanca wan ji holêrakirina destkeftiyên me ne. Gelê Kurd îro di Rojhilata Navîn de destkeftiyên xwe zêde dikin. Ji ber wê jî tirsa dewletê zêde dibe û ji bo van destkeftiyan ji holê rakin jî êriş dikin. Ew bi hişmendiya xwe ya rizyayê dixwazin vîna gelê kurd destêser bikin. Me çawa ku duh qebûl nekir, em îro jî qebûl nakin û tucarî qebûl nakin. Dixwazin em çong daynin. Lê me tu carî li dijî wan çongê daneynîye. Em ê tu carî jî daneynin. Têkoşîna me ya li dijî vê yekê berdewam dike û em ê bersiveke xurt bidin.”
‘Xwedî li destkêftiyên xwe derbikevin’
Mustafa Dayan diyar kir ku çalakiyên li dijî tayinkirina qeyûm wê bidomin û ji bo tevlîbûna çalakiyan ew bang li gelê Sêrtê kir: “Çalakiyên me 5 rojin berdewam dike. Dê ji niha û şûnve jî bidome. Em her roj li kolaneke çalakiyên xwe pêk tînin. Em ê kolan bi kolan çalakiyên xwe bidomînin. Li ber şeredariyê jî em bi dirûşim û govendê çalakiyên xwe didomînin. Bi şev jî li taxan em van çalakiyên xwe didomînin. Em bang li gelê Sêrtê dikin ku xwedî li vîna xwe û destkeftiyên xwe derbikevin. Heke xwedî dernekevin wê rojane êrişî desteftiyên me bikin û wê li her maleke me tecride ferz bikin. Divê gelê me li dijî van êrişan bisekinin û xwedî li şeredariya xwe derbikevin.”
‘Em bi hev re bersivekê bidin hişmendiya qeyûm’
Eşref Tekîn jî balkişand ser kiryarên qeyûman ên salên borî û wiha got: “Ew cara 3emîn e qeyûm tayînî Şaredariya Sêrtê dikin. Ji roja qeyûm tayin kirind heta niha em li kolanê ne û qeyûmê wan nas nakin. Ew çiqas bixwazin vîna gelê kurd bi qeyûman desteser bikin jî dê nekarin bigehejin encamê. 3 carin qeyûm tayin dikin, lê nikarin vîna gelê Sêrtê bişkînin. Gel di hemû hilbijartinan de bersiva sepana qeyûm dide. Bersiva herî mezin a li dijî vê biryara bêhiqûqî jî ew e. Di salên borî de jî me dît dema qeyûm tayin kirin di destpêkê de êrişî saziyên ziman, çand, hunerê û qadên jinan kirin. Bi taybet jî êrişî zimanê kurdî dikin. Ji bo wê em dibêjin tayinkirina qeyûm zilm e û darbeya li dijî vîna gel e. Em dibêjin divê dev ji vê sepanê berdin.”
Eşref Tekîn di dawiya axaftina xwe de destnîşan kir ku ew ê bi çalakiyan tayinkirina qeyûm şermezar bikin û wiha bi dawî kir: “Em ê li qadan li berxwe bidin. Ji ber ku em mafdar in. Em dibêjin heke hûn me nasnekin, em jî wê nas nakin. Ji roja qeyûm hatiye tayinkirin heta niha em çalakiyên xwe didomînin. Banga me li gelê Sêrtê jî ew e ku tevlî van çalakiyan bibin û xwedî li vîna xwe derbikevin. Em bi hev re bersiveke mezin bidin vê hişmendiya qeyûm.”
