Jinên ku li Amedê bi minasebeta 8ê Adarê Roja Jinan a Cîhanê daketin kolanan, peyama Rêberê PKKê Abdullah Ocalan nirxandin û gotin: “Divê em her dem ji bo aştiyê li qadan bin. Em ê li qadan banga ‘Jin Jiyan Azadî’ bilind bikin. Azadî nêzîk e.”
Jin li gelek bajaran bi minasebeta 8ê Adarê Roja Jinan a Cîhanê jin çalakiyên cur be cur li dar dixin. Jinên ku li qadan çalakiyan pêk tînin, daxwazên xwe yên azadiyê tînin ziman. Li Amedê jî çalakiyên jinan berdewam dikin. Jin di hemû çalakiyên xwe de dirûşma “Jin Jiyan Azadî” berz dikin. Jinên ku bi minasebeta 8ê Adarê daketin kolanan, têkildarî banga Rêberê PKKê Abdullah Ocalan ji Ajansa Welat re axivîn.
‘Azadî û aştî nêzîk e’
Tugba Çetîk destnîşan kir ji bo azadiyê pêwîste ew bi xwe û rêxistina xwe bawer bin û got: “Ev 8ê Adarê ji bo me cuda ye. Em bi gotinên aştiyê diçin 8ê Adarê. Em dixwazin aştî pêk werê lê serî de pêwîste ku em xwe û rêxistina xwe bawer bin. Asta yekemîn ya aştiye, azadiye jinan e hewceye jin azad be û nasname jin bê naskirin. Lê em e her tim dijî desthilatdar û malbatê di nava têkoşîne de bin. Jin azadiyê dixwazê, ez bawerim ku azadî jî îsal yê were. Azadî û aştî nêzîk e.”
‘Banga me azadbûna her kesî ye’
Gulistan Baran diyar kir ku pêwîste dewlet gavan biavêje, şer bisekînine û wiha got: “Em îro li qada ne, me dengê xwe bilind kir ku ji bo jin neyên kuştin. Banga me azadbûna her kesên ku li ser cîhanê dijîn. Niha li Kurdistanê û Tirkiyeyê aştî tê axaftin, em jin dixwazin banga azadiyê hin zêdetir be û her kes azad bijî. Me tu carî şer nexwest û em dixwazin şer bisekine. Banga Abdullah Ocalan bangekî dîrokî ye, ez hêvî dikim ku dewlet jî li gorî vê bangê tevbigere.”
‘Em ê banga Jin jiyan azadî bilind bikin’
Gulistan Alokmen jî anî ziman ku divê aştî bi gotinan nemîne û wiha got: “Hikûmet isal wekî ‘sala malbatê’ îlan kir, lê ez karkerim cihê ku ez dixebitim sîstema mêrperestî tê bikaranîn. Bi gotinan çênabe pêwîste ku dewlet gav biavêje. Bi hezaren jin hatin qetilkirin. Di nava malê de jî di nav kar de jî jin tên astengkirin. Em vê qebûl nakin û em dibêjin tu kes nikare derî li ser me dade, me ji jiyanê dûr bixe. Em ê her tim li qadan bin û em ê banga ‘Jin jiyan azadî’ bilind bikin. Ji bo têkoşîna jinan mezin bibe em ê di nava tevgerê de bin. Jin aştiyê dixwazin, ev banga aştiyê hatiye, hewceyê ku bibe sedem û dawiya şer. Divê gotina aştiyê ne tenê ne ser gotinan bimîne û em di nava azadiyê de bijîn.”
‘Jinên kurd ji bo aştiyê amade ne’
Nurşîn Aslaner jî da zanîn ku jin her tim aştîxwaz in û wiha got: “Em her sal bi dengê xwe li qada ne, daxwaza jinan eşkere ye. Em ji her rengî û ji her dengî re aştî û azadî dixwazin. Niha nû nû behsa aştiye tê kirin, jin her tim aştîxwaz bûn, jixwe hebûna jinan daxwaza aştiyê ye. Ji bo aştî pêk were em gelek bi kelecan in, ji bo aştiyê çi destê me were em ê bikin. Jinên Kurd ji bo aştiyê amade ne, niha pêwîste ku dewlet gav biavêje.”
