Berdevkê Tevgera Goran û Waliyê Silêmaniyê li Newroza Amedê axivîn û xwestin Abdullah Ocalan bigihîje azadiya xwe. Hevseroka DBPê Çîgdem Kiliçgun jî anî ziman ku ew hêvî dikin ev Newroz bibe Newroza azadiya Abdullah Ocalan.
Newroza îsal bi şiyara “Rêbertiya Azad, Civaka Demokratîk” ji hêla DEM Partî, DBP û TJAyê ve tê lidarxistin. Pîrozbahî bi hemû coş û kêlecanê berdawam dike. Tevî ku kêliyek baran jî bariya girse terka pîrozbahiyê nekir û li qadê govenda azadiyê gerand.
Grûb Avna derket ser dikê û li ber stranên rocka Kurdî bi deh hezaran kes coşand.
Berdevkê Tevgera Goran Dilêr Evdilxaliq derket ser dikê û Cejna Newrozê li tevahiya gelê Kurd pîroz kir û bal kişand ser pêvajoya ji aliyê Rêberê Gelê Kurd Abdullah Ocalan ve hatiye destpêkirin.
‘Bila ev Newroz bibe Newroza azadiya Ocalan’
Piştre Waliyê Silêmaniyê Heval Ebûbekîr derket ser dikê û pîrozbahiya Newrozê li gel kir û bal kişand ser pêvajoya aştî û çareseriya demokratîk. Heval Ebûbekîr destnîşan kir ku ew hêvî dikin ku ev Newroz bibe Newroza serkeftin û yekitiyê û got: “Em dibêjin bila ev Newroz bibe Newroza azadiya birêz Ocalan.”
‘Bila bibe Newroza azadiyê’
Hevseroka Giştî ya DBPê Çîgdem Kiliçgun Ûçar jî destnîşan kir ku ew Newroza Rojava, Başûr û Rojhilat pîroz dikin. Çîgdem Kiliçgun Ûçar anî ziman ku Newroz bi berxwedan û agirê bedena Mazlum Dogan hatiye gihîştiye roja îro. Çîgdem Kiliçgun Ûçar anî ziman ku ew hêvî dikin ev Newroz bibe Newroza azadiya Rêberê Gelê Kurd Abdullah Ocalan.
Piştî axaftina Çîgdem Kiliçgun, stranbêj Rewşan Çelîker derket ser dikê û stranên ji hev xweştir got. Girseyê li ber stranan govend gerand.
Newroza Amedê bi dirûşmên “Bijî Serok Apo” , “Bê Serok jiyan nabe” û “Jin jiyan azadî” bi dawî bû.
