Amed – Mehmet Gultekînê ku li gundê Qerelî yê navçeya Bismilê cotkariya pembû dike, destnîşan kir ku hilberîna pembû li gorî salên borî pir kêm e û got: “Kar û zirara me hev dernaxe. Em qezenc nakin.”
Li gundê Qerelî yê navçeya Bismilê ya Amedê berhevkirina pembû ku di dawiya meha Îlon û Cotmehê de dest pê dike didome û cotkar ji berhemdariya îsal a pembû gelek bi gazinc in. Berhema pembû ya îsal gelek kêm e. Cotkar ji bihayê mazot û gubreya ku ji bo çandina pembû bi kar tînin jî gelek bi gazinc in. Her wiha cotkar di destpêkê de pembûyên xwe ji nav erd berhev dikin û bi traktoran dibin kargeha pembû ya gund. Li wir pembû û dendika wê ji hev didin veqetandin. Pişt re jî pembû tê balyekirin û dibin kargehên çirçire, dibe ben û elyaf, dendik jî ji kargehên rûn re tên şandin. Di heman demê de ji bo karkerên ku li nava erd dixebitin milyon û nîv pere tê veqetandin. Milyonek û 300 hezar lîre jî ji bo xebata çinîn a bîçerê û 2 milyon û 500 hezar jî ji bo dermanan tê veqetandin. Milyonek û 500 lîre didin gubreyê û milyonekê jî didin heqê ceyranê. Traktorek serê kêlana donimekê lîtreyek mazot dişewitîne û lîtreya mazotê bûye 55 lîre. Ji ber vê yekê cotkar gelek zehmetiyan dikişînin. Heta niha tu tiştek nehatiye guhertin. Têkildarî vê rewşê em bi cotkar Mehmet Gultekîn re axivîn.
‘Kîloya pembû weke xwe ye nehatiye guhertin’
Cotkar Mehmet Gultekîn diyar kir ku rewşa cotkaran ji aliyê aboriyê ve gelek xirab e û wiha got: “Her roja diçe rewşa aboriyê xerabtir dibe. Em ji DEDAŞê û ji fabrîkatoran re dixebitin. Dema ku em pembû av bidin hemû keda me ji DEDAŞê û ji gubreyê re diçe. Ji ber ku ceyran li aliyekî û gubre jî li alîyekî her du jî gelek bandorê li ser me dikin. Tona gubreyê bûye 35 hezar lîre êdî tu kes nikare gubreyê jî bistîne. Hê jî kîloya pembû 26-27 lîre ye, zêde nebûye. Em zirar dikin. Ev sê sal in bihayê kîloya pembû weke xwe ye, nehatiye guhertin. Hemû zirar e, em ji DEDAŞê û ji gubreyê re dixebitin. Cotkar pir mexdûr in. Tu karek tune ye, êdî cotkarî mirî ye. Dema ku dewlet destê xwe biavêjê dê ev pirsgirêk çareser bibe.”
