Danişîna doza H.Î. yê ku ji ber tacîza zayendî ya li dijî zaroka xwe tê darizandin, li Rihayê hat dîtin. Dadgehê daxwaza girtina H.Î. red kir.
Kesê bi navê H.Î. ê li Rihayê dijî, ji ber sûcê ku ji 5 saliyê heta 8 saliya wê tacîza zayendî ya sîstematîk li keça xwe kiriye, tê darizandin. Danişîna 4emîn a dozê li 3yemîn Dadgeha Cezayên Giran a Rihayê hat dîtin. Parêzerên zarokê û dayika wê, 4 parêzerê faîlî, parêzerên Wezareta Malbat û Xizmetên Civakî, endamên Nûnertiya UCÎMê ya Rihayê tev li danişînê bûn.
Di danişînê de ji ewil li hevala zarokê weke şahid hat guhdarîkirin. Piştre jî parêzer Miyaser Çelîk axivî û got ku tu nakokî di îfadeyên zarokê de nînin û xwest faîl were girtin. Miyaser Çelîkê xwest daxwaza beşdarbûna dozê ya UCÎMê were qebûlkirin.
Parêzera UCÎMê Sena Nûr Koç jî got: “Bersûc, hem gefan li dayikê dike hem jî li zarokê. Lewma dayik her tim diçe derveyî bajar. Zextan li dayikê dike ku îfadeyên xwe biguherîne. Lewma divê teqez were girtin.”
Dozger, xwest faîl negirtî were darizandin û bi daxwaza cezayê mutalaa pêşkeş kir. Dozger xwest ku faîl ji sûcên “îstîsmara zayendî” û “mustehceniyê” were cezakirin.
Parêzerên bersûc jî ji bo parastina li dijî mutalaayê dem xwestin.
Dadgehê, daxwaza girtina bersûc û daxwaza tevlibûna dozê ya UCÎMê red kir. Dadgehê daxwaza demê ya parêzerên bersûc qebûl kir û danişîn taloqî 25ê hezîranê kir.
