Dayikên ku beşdarî çalakiya Komeleya Lêkolîna Çand û Ziman a Avesta bûn, xwestin zimanê kurdî bibe zimanê fermî û perwerdehiyê.
Komeleya Lêkolînên Çand û Ziman a Avestayê bi minasebeta Zimanê Kurdî bibe zimanê fermî û zextên li ser ziman û çanda kurdî bi dawî bibe li ber avahiya saziyê daxûyanî da çapemeniyê. Dayikên ku beşdarî daxuyaniyê bûn, piştî daxuyaniyê daxwazên xwe yên ji bo ziman anîn ziman.
‘Bila zarokên me li dibistanan bi kurdî perwerde bibin’
Hevseroka Komeleya Lêkolîna Çand û ziman a Avestayê Kurdiye Irgat têkildarî mijarê axivî û got: “Ziman mafê mirovahiyê ye. Dema mirov ji dayîk dibe bi zimanê dayîka xwe bi dayîk dibe. Wek hemî zimanan Zimanê Kurdî jî pîroz e.” Kurdiye Irgat bal kişand ser înkarkirin û zextên li ser zimanê Kurdî û wiha berdewam kir: “Zarokên kurdan û malbat bi xwe jî bi dilrehetî û bi azad nikarin zimanê xwe biaxivin.” Kurdiye Irgat ji bo xebatên xwe yên komeleya Avestayê jî wiha got: “Em hewl didin dersan bidin malbatan û zarokan. Lê dîsa jî têrê nake. Kurdiye Irgat herî dawî destnîşan kir ku ew dixwazin Zimanê Kurdî bibe xwedî statu û bibe zimanê fermî û got: “Em dizwazin zarokên me ji destpêka dibistanê heta dawiyê bi zimanê xwe bixwîn e.”
‘Bila Kurdî bibe zimanê fermî’
Aktîvîsta TJA yê Emîne Bozdag jî da zanîn ku mafê gelê kurd e û hewcedariyeke mezin e ku zimanê Kurdî bibe zimanê fermî û got: “Ez jî wek hemû zarokên kurd dema min li dibistanê kurdî axaftin kiriye lêdan xwariye. Ev lêdana ku min ji bo axaftina zimanê xwe xwariye di dilê min de bûye kul û kederek. Ez naxwazim zarokên min wisa mezin bibe. Ji dibistana seretayî bigre heta zaningeha di her qadî de ez dixwazim zimanê Kurdî bibe zimanê fermî.” Emîne Bozdag her wiha ji bo vekirina Avestayê jî got “Ev sazî bo me destkeftiyek mezin e û em dixwazin zarokên me werin vir.”
‘Divê zarokên me biçin saziyên kurdî ziman fêr bibin’
Herî dawî Dayîka Siltan jî ciwanên kurd rexne kir û got: “Mirov her du zimanan bizanibe baş e. Lê çima gelek caran dibînim ku ciwanên me nikarin Kurdî biaxivin. Çima nizanin biaxivin? Bila zimanê xwe hîn bibin. Zimanê me rûmeta me ye. Ez dixwazim zarokên me biçin saziyên me û Kurdî hîn bibin.”
