Amed – Rêvebera MED TUHAD FEDê der barê kampanyaya pereşandina girtîgehan a ku dane destpêkirin wiha got: “Me niha li 10 bajaran dest bi kampanyayê kiriye. Lê heta ev zilma ku ji ber şandina pereyan li girtiyan û malbatên wan tê kirin bidome dê ev kampanyaya me jî berdewam bike.”
Di demên dawî de pere şandina ji girtiyan re demên dawî de ji aliyê dewleta tirk ve dibe sedema doz vekirinê. MED TUHAD FED li dijî vê nêziktiya dewletê li 10 bajaran kampanyaya pereşandina ji girtiyan re da destpêkirin. Xebata yekemîn a vê kampayayê jî TUAY-DERê li Amedê pêk anî.
Rêvebera MED TUHAD FEDê Emîne Kaya der barê kampanyaya ku dane destpêkirin û armanca wê ji Ajansa Welat re axivî.
Emîne Kaya di destpêka axaftina xwe de bal kişand ser kesên ku ji ber pere şandinê doz li wan hatine vekirin û ev tişt anî ziman: “Wek tê zanîn der barê kesên ku ji girtiyan re pere bişînin re doz tên vekirin an jî bi vê mijarê re girêdayî girtî tên sirgunkirin. Bi vî awayê dewlet nahêle ku hem malbat hem jî girtî ji mafên xwe sûd werbigirin. Bi dozvekirina li malbatan û sirgunkirina girtiyan re herdu alî jî tên cezakirin. Wek MED TUHAD FED em ji bo ku karibin bal bikşînin ser vê mijarê me dest bi kampanyaya şandina pere ya ji girtiyan re kir.”
Emîne Kaya di berdewamiya axaftina xwe de wiha got: “Her çiqas vê kampanyayê me dabe destpêkirin jî hemû sazî û kesên dilxwaz dikarin xwe tev li vê kampanyayê bikin. Me niha li 10 bajaran dest bi kampanyayê kiriye lê heta ev zilma ku ji ber şandina pere li girtiyan û malbatên wan tê kirin bidome dê ev kampanyaya me jî bi awayeke berfirehtir berdewam bike.”
Emîne Kaya diyar kir ku gelek mafên girtiyan tên binpêkirin û wiha dirêjî da axaftina xwe: “Îro ne tenê ji bo binpêkirina mafê pereşandinê wek MED TUHAD FEDê dê li dijî hemû binpêkirinên mafan ên di girtîgehan de dê xebatên me bidomin. Girtî bi rêya malbatên xwe û çapemeniyê binpêkirinên ku li girtîgehan dertên holê radigihînin. Li dijî van binpêkirinan divê em karibin hin tiştan bikin û bibin dengê girtiyan.”
Emîne Kaya di dawiya axaftina xwe de wiha axivî: “Îro di nav her qadên civakê de pirsgirêkên cur be cur hene lê heke em li dijî van pirsgirêkan nebin yek û dengê xwe gur nekin dê pirsgirêkên me ji holê ranebin. Divê herkes zanibe ku dengê gur dikare li her derê belav bibe.”
