Guftûgoyên di navbera Îran û DYAyê de li ser bernameya nûkleerî berdewam in. Îranê ragihand ku ew li ser pêşnûmayeke nû dixebite lê di navbera aliyan de pirsgirêka baweriyê bijarteka dîplomasiyê qels dike.
Îranê ji ber fikarên dê êriş pêk bê dest bi xurtkirina baregehên xwe yên leşkerî û nûkleerî yên stratejîk kiriye. Ev yek rîska şaş fêmkirineke muhtemel di navbera her du welatan de zêde dike. Serokê DYA’yê piştgiriya xwe ji bo xwepêşanderan ragihand û di hin daxuyaniyan de li ser polîtîkayên tundtir ên li dijî rejîma Îranê sekinî. Waşîngton peyamê dide ku lihevkirinek çênebe, cezayên aborî û mudaxeleya leşkerî jî di nav de hemû vebijêrk li ser masê ne. Tê ragihandin ku DYA hebûna xwe ya leşkerî li Rojhilata Navîn xurt dike. Çavdêr destnîşan dikin ku nîşanneyên çekdariyê yên her du aliyan pêvajoya dîplomatîk lawaz dike.
‘Îran dikare bonbeya nûkleerî çê bike’
Nûnerê Taybet yê Amerîkayê yê Rojhilata Navîn Steve Witkoff ji Fox Newsê re got ku Îran dikare di hefteyek de çeka atomê çêke. Witkoff diyar kir ku Amerika bi tu awayî vê qebûl nake. Ligel gef û çewsa DYAyê jî Îran hewl dide ku bi rêya dîplomasiyê rîska pevçûnê kêm bike û dixwaze xwe ji şerê rasterast yê bi DYEyê re dûr bixe, lê tengezariyeke mezin berdewam dike.
Tehemûla gelên Îranî ji zextan re nemaye
Tê ragihandin ku protestoyên bi giranî ji aliyê xwendekarên zanîngehê ve tên birêvebirin, li hin bajarên mezin ji nû ve gur bûne. Zehmetiyên aborî, enflasyona bilind, bêkarî û daxwazên ji bo azadiya siyasî di nav sedemên sereke yên xwepêşandanan de ne. Tê ragihandin ku hêzên ewlehiyê destwerdan li xwepêşandanan kirine û gelek kes hatine binçavkirin. Rêxistinên navneteweyî yên mafên mirovan derbarê pêvajoyên dadwerî û cezayên giran ên ku hatine dayîn de fikarên xwe anîne ziman.
