Zarokê 18 mehî Mehmet Uytun di sala 2009an de bi çeka leşker Hakan Alkan jiyana xwe ji dest dabû. 4emîn Dadgeha Cezayê Giran a Esliyeyê ya Cizirê di danişîna 8emîn de bersûc Hakan Alkan beraet kir.
Li navçeya Cizîrê ya Şirnexê di 9ê Cotmeha 2009an de dema leşkeran êrîşî çalakiyekê kiribûn, leşker Hakan Alkan bi çeka leşkerî zarokê 18 mehî Mehmet Uytun kuşt. Derbarê bersûc Hakan Alkan de doz hatibû vekirin û 3 sal û 4 meh ceza li leşker hatibû birîn. Li ser îtîraza parêzerên malbatê, dadgeha bilind biryara 4emîn Dadgeha Cezayên Esliyeyê ya Cizîrê dabû betal kir û Mehmet Ûytûn carek din hate darizandin.
Îro bi tevilbûna parêzerên malbata Uytun, endamên OHDê, ÎHD û Baroya Şirnex û leşkerê bersûc Hakan Alkan bi rêya SEGBÎSê tevlî 8emîn danişîna dozê bûn.
Kujer: Dewlet peywir da me
Piştî tespîtkirina nasnameyan, parêzerên malbata Mehmet Uytun diyar kir ku dema kuştina kesekê bi destê hêzên ewlehiyê çêdibe, bersûc xwe diavêjin pişt dewletê û diyar kirin ku bersûc bi îdiaya ‘dewletê peywir daye me’ xwe pak dikin. Parêzeran da zanîn ku di gelek dozan de ji ber ku girtin pêk nayên, kujer direvin derveyî Tirkiyeyê û em bi guman in ku ev doz jî dê wisa bi encam bibe.
Parêzerên malbatê xwestin ku daraz li Dadgeha Cezayên Giran pêk were û bersûc, ‘bi kuştina qestî’ bê darizandin. Piştî axaftina parêzeran, dozgeriyê mutalaya xwe da û xwest daxwaza guhertina heyeta dadgehê were redkirin. Dozgeriyê her wiha mutalaya xwe ya berê dubare kir û xwest bersûc Hakan Alkan were cezakirin.
Piştî mutalaya dozgeriyê, heyeta dadgehê bersûc Hakan Alkan beraet kir.
