Endama Serokatiya Konseya PYDê Foza Yûsif diyar kir ku derbarê Bakur Rojhilatê Sûriyê de gelek agahiyên xelet ên di çarçoveya şerê taybet de tên meşandin û xwest ku tenê daxuyaniyên HSDê esas bên girtin.
Endama Serokatiya Konseya PYDê Foza Yûsif tev li Stêrk Tvyê bû û têkildarî êrişên li ser Bakur Rojhillatê Sûriyê agahî dan. Foza Yusif xwest ku daxuyaniyên HSDê esas bên girtin û şopandin. Yusif wiha axivî: “Niha gelek agahiyên derew û xelet tên belavkirin. Tê xwestin tirs di nav gel de çêbibe. Ev rêbazên şerê taybet û psîkolojîk in. Li gelek deveran pevçûn berdewam dikin. Êrişên li dijî Herêma Cizîrê di asteke xeter de ne. Hêzên YPG-YPJê li dijî hemû êrişan bi awayekî lehengî li berxwe didin. Armanca êrişkaran ew e hem komkujiyê pêk bînin hem jî gelan bi hev bidin qirkirin. Divê gelê me li her derê şiyar be û li ser piyan be.”
