Berdevka Meclisa Jinan a DEM Partiyê Halîde Turkoglû bi lêv kir ku ew ê di meha Gulanê de civînên xwe yên bi jinan re li darbixin û got: “Em ê li dijî desthilata zilam, tundî û kuştinê têkoşîn û rêxistinbûyina xwe mezintir bikin.”
Berdevka Meclisa Jinan a DEM Partiyê Halîde Turkoglu beriya civîna Meclisa Jinên a Anatoliyeya Navîn li navenda partiya xwe ya giştî daxuyanî da. Halîde Turkoglu di destpêka axaftina xwe de bi lêv kir ku di meha Gulanê de ew dê civînên xwe yên jinan pêk bînin û rêxistina xwe ya jinan mezin bikin. Halîde Turkoglu da zanîn ku li dijî desthilatdariya zilam, tundî û kuştina jinan ew ê têkoşîna xwe mezintir bikin.
Halîde Turkoglu bal kişand ser geşedanên di doza Gulîstan Doku de pêk hatinê û wiha dirêjî da axaftina xwe: “Bûyera Gulîstan Dokuyê rastiya saziyên dewletê û pergala wê radixe li ber çavan. Divê faîlên Rojîn Kabaîşê, Rojwelat Kizmaz û hemû jinan jî bên dîtin û bûyer bên cezakirin.”
‘Ji bo aştiyê divê desthilat vegere ser peymana Stenbolê’
Halîde Turkoglu destnîşan kir ku aştî bi vîna jinan pêkan e û wiha got: “Bi binpêkirinên li dijî mafên jinan, bi polîtikayên bêcezakirinê yên li dijî jinan aştî pêk nayê. Careke din vegerîna Peymana Stenbolê ji bo aştiyê jî gaveke erêniyê. Em weke jin dev jî Peymana Stenbolê bernadin. Divê tundî di nava civakê de nayên rewakirin. Bûyerên di dibistanan de pêkhatinê jî encamên vê derxistin holê. Sedema van bûyeran jî rewabûna tundiyê û polîtikayên zayendperest ên dewletê bûn. Divê dev jî polîtikayên zayendperest bên berdan û tundî neyê rewakirin.”
Di 1ê Gulanê de li qadan bin’
Halîde Turkoglu diyar kir ku ew dê ji bo mafê astengdaran di 3ê Gulanê de li Amedê çalakiya meşê li dar bixin û bang li welatiyan kir ku tevli meşê bibin. Halîde Turkoglu anî ziman ku ew ê di 1ê Gulanê de ji bo mafê jinan li qadan bin û wiha pê de çû: “Em ê ji bo 6 jinên karker ku li karkega parfumê ya Kocaeliyê jiyana xwe ji dest dan û hemû mafên xwe li qadan bin.”
