Artêşa Îsraîlê bi peyameke ‘lezgîn’ gef li niştecihên Başûrê Libnanê xwarin û diyar kir ku tevî agirbestê jî hêzên wan li herêmê ne. Di peyamê de hat xwestin ku heta daxuyaniyeke din welatî venegerin herêma başûrê Çemê Lîtanî û bi dehan gundên derdorê.
Artêşa Îsraîlê li nav axa Libnanê herêmê qedexekirî îlan dike û hebûna xwe ya li vir mayînde dike. Artêşa Îsraîlê ji bo niştecihên Başûrê Libnanê peyameke hişyariyê weşand. Di daxuyaniya ku wekî peyama lezgîn hat belavkirin de, hat diyarkirin ku di dema agirbestê de jî artêşa Îsraîlê li dijî çalakiyên Hizbullahê wê li çeperên xwe yên li Başûrê Libnanê bicihbûyî bimîne.
‘Nêzî Çemê Lîtanî nebin’
Di peyamê de, bi hinceta “ewlehiya canê welatiyan” gef hatin xwarin û ji niştecihên herêmê hate xwestin ku heta daxuyaniyeke din ber bi başûrê xeta gundan ve neçin. Her wiha bi tekezî hat destnîşankirin ku nêzîkbûna li herêma Çemê Lîtanî, Geliyê Salhiye û Selukiyê qedexe ye.
Lîsteya gundên ku veger qedexe ye
Di berdewamiya daxuyaniyê de, lîsteyeke dirêj a gund û navçeyan hat eşkerekirin û ji welatiyan hat xwestin ku derbasî van deran nebin û venegerin malên xwe. Navên cihên ku ji aliyê artêşa Îsraîlê ve hatine qedexekirin ev in:
El Beyada, Şama, Teyr Herfa, Ebu Şaşî, El Cebîn, En Nakura, Zahîre, Metmore, Yarun, Um Tute, Ez Zlutî, Bistan, Şihîn, Mrohîne, Ramiye, Bint Cebel, Beit Lîf, Salhane, Eş Şab (Aita eş Şab), Hunîn, Et Tairî, Reşaf, Marun er Ras, Aynata, Kunîn, Aytarun, Blîda, Mahîbîb, Meys el Cebel, Kale Daba, Hula, Markaba, Telluse, Benî Hayyan, Rabb et Telatîne, El Adîsa (Merceyun), Kefr Kela, Et Tayyibe, Deir Siryan, Kantara, Alîman, Adşît el Kasir, El Kasir, Meysat, Îskenderuna, Şebaa, Ceceîm, Ez Zahîre, Yarîn, Harbet el Kesîf, El Hiyam, Salîb, Mazraet Sarde û Mecîdiye.
