Amed- Serokê Baroya Amedê Abdûlkadîr Guleç diyar kir ku ev nêzîkatîya nûnerê ABD ji bo siberoja herêmê xetere ye û got: “Ev dê herêmê bêtir bixe nava kaosek kûrtir. Divê her kes rêzê ji daxwazên gelê Kurd ên rewa re bigire.”
Parêzerên Baroya Amedê ji Nûnerê Taybet ê Amerîkayê yê berpirsiyarê Kar û Barên Sûriyeyê Thomas Barrack re nameyek şand. Di nameyê de dan zanîn ku di 50 salên dawî de, zêdetirî 500 hezar Kurd li Îran, Iraq, Tirkiye û Sûriyeyê hatine kuştin. Di nameyê de dan zanîn ku Kurd ji bo hebûn, azadî û wekheviyê bedelên bêhempa dane. Baroyê di berdewama nameyê de şerê li dijî DAÎŞê jî bibîr xist û got: “Kurdan ne tenê ji bo azadiya xwe, lê di heman demê de ji bo mirovahiyê jî bedel dan. Nêzîkatiya ‘Em tiştekî deyndarê wan nînin’ li hember vê qurbanîdana hevalbendên we yên Kurd xeletiyek exlaqî û stratejîk a cidî ye. Lê gotinên te yên ‘Yek netewe, yek dewlet, yek artêş, yek Sûriye’, ku daxwazên Kurdên Sûriye û Iraqê paşguh dike, ne tenê siya xwe diavêje ser vê têkoşîna bi rûmet. Di heman demê de prensîbên azadî û mafê çarenûsî yê gelan, ku felsefeya damezrîner a Dewletên Yekbûyî yên Amerîkayê ne, jî têk dibe.”
Baroyê di dewama nameyê de anî ziman ku ev name dengê hêrs û hêviya gel e û wiha lê zêde kir: “Dibe ku hûn tiştekî deyndarê gelê Kurd nebin, lê hemû gelên cîhanê, nemaze gelên Dewletên Yekbûyî yên Amerîkayê, deyndarê Kurdan in. Bi bîranîna me ku mîrata azadiyê ya Jefferson di têkoşîna gelê Kurd a ji bo azadî û wekheviyê de rolek dilîze. Em hêvî dikin ku hûn di axaftinên xwe yên pêşerojê de guh bidin vî dengî. Ji ber ku senaryoya ku hûn hewl didin binivîsin bêyî ku dîroka vê erdnigarîyê fam bikin, ne li gorî rastiya Kurdan û ne jî ya gelên din ên bindest e. Edalet tenê bi guhdana dengê gel mimkun e.”
Serokê Baroya Amedê Abdûlkadîr Guleç der barê mijarê de axivî û wiha got: “Ev nêzîkatîya nûnerê ABDyê xetera wê yekê dide ku herêmê bixe nav kaosek kûrtir.”
Serokê Baroya Amedê Abdulkadîr Guleç, bal kişand êrîşa li ser Durzîyan û wiha berdawan kir: “Ev kom temsîliyeta zihniyetekê dikin ku koletiya Kurd, Elewî Ereb, Durzî û kêmneteweyên din hedef digire û kesên ku bi wan re ne li hev in bi hovane ji holê radikin. Dikare êrîşên nû li ser Kurdan û civakên din ên cihêreng li Sûriyeyê rewa bike û teşwîq bike û rê li ber pevçûnên nû veke. Ev nêzîkatî xetera wê yekê dide ku herêmê bixe nava kaoseke kûrtir. Daxwazên Kurdan ji bo statûyên “Nenavendî” yên mîna federasyon û xweseriyê ne îmtiyaz an jî cudakarî ne; berevajî vê, ew şertên herî kêm in ji bo avakirina rêziknameyek demokratîk li Sûriyeyê. Paşguhkirina van daxwazan li şûna aştiyê pevçûnê pêş dixe.”
Abdulkadîr Guleç herî dawî da zanîn ku li şûna nêzakatiya ku hişmendiya barbar xurt dike helwestek bê nişandan û rêzê ji daxwazên rewa yên gelê Kurd û civakên din ên li Sûriyeyê re bigirin.”
