Amed – Starta Newroza îsal li navçeya Licê hate dayîn. Welatiyên tev li Newrozê bûn wiha gotin: “Em dixwazin serokê me bê berdanê di nava me de be.
Starta Newroza ku îsal bi dirûşma “Rêbertiya Azad, Civaka Demokratîk” tê pîrozkirin duh li navçeya Licê ya Amedê hate dayîn. Welatiyên ku tev li Newroza Licê bûn têkildarî Newrozê û banga Rêberê Gelê Kurd Abdullah Ocalan “Aştî û Civaka Demokratîk” de axivîn.
Welatiyê bi navê Farûk Karaman (50) diyar kir ku keyfxweş in ku tev li Newrozê bûne û wiha got: “Em dilxweş in. Em bi vê pêvajoya hatiye destpêkirin pir bi dilxweş in. Kuştin bi dawî bibin dê pir baş be. Em li pey Rêberê Gelê Kurd in. Serokê me bêje çi em di riya wî de ne.”
‘Em dixwazin serokê me di nava me de be’
Dayika bi navê Halîme Elçî (60) jî diyar kir ku dê Newroza îsal bi coştir derbas bibe û wiha axivî: “Newroz pîroz be. Berxwedan jiyan e. Îşelah em ê serbikevin. Em dayik aştiyê dixwazin. Naxwazin êdî tu dayik bigirîn. Em yekitiyê dixwazin. Bila em bibin yek û aştî pêk were. Em dixwazin serokê me bê berdanê di nava me de be. Bê berdan ew ê aştî jî û yekitî jî pêk were.”
‘Divê ev Newroz bibe Newroza piştgirî û piştevaniyê ya birêz Abdullah Ocalan’
Welatiyê bi navê Nedîm Esmer (66) diyar kir ku Newroza Licê Newrozeke dîrokî ye û wiha got: “Daxwaza me ew e ku îsal her kes beşdarî Newrozê bibe. Ji bo ku aştî, xweşî çêbibe kes neyê kuştin divê herkes tev li Newrozê bibe û Newroz destpêka aştiyê ye.”
Nedîm Esmer di berdewama axaftina xwe de ev tişt gotin: “Divê ev Newroz e ji bo birêz Abdullah Ocalan bibe Newroza piştgirî û piştevaniyê. Divê em pişta wî xurt bikin ku aştiyekê bîne vî welatî. Divê ji 7 salî heta 70 salî ji bo birêz Ocalan tev li Newrozê bibin.”
‘Bila Serokê me berdin’
Dayika bi navê Zahîde Kazak jî xwest ku aştî pêk were û wiha got: “Em aştiyê dixwazin. Bila Serokê me berdin.”
Divê şert û mercên Abdullah Ocalan bên guherîn
Yûsûf Peker (67) da zanîn ku geşedanên li Sûriyeyê girêdayî banga Rêberê Gelê Kurd Abdullah Ocalan in. Yûsûf Peker, anî ziman ku ji bo Rêberê Gelê Kurd Abdullah Ocalan bi muxataban re bikeve têkiliyê divê di şert û mercên wî de guherîn bên kirin.
‘Serokê me her tim rêya rast daniye pêşiya gelê xwe’
Welatiya bi navê Fatma Gulen (39) jî wiha got: “Newroz cejna gelê kurd e, sembola Kurdistanê ye. Sembola Mazlûm Doganan e. Newroz rêya azadiyê ye. Newrozê li her çar parçeyê Kurdistanê pîroz dikim. Me ji bo Newrozê pir bedel dane. Heya ku Kurdistan azad bibe, em tu carî vê rêyê bernadin.”
Fatma Gulen bal kişand ser peyama Rêberê Gelê Kurd Abdullah Ocalan û wiha domand: “Serokê me her tim rêya rast daniya pêşiya gelê xwe. Em jî rêya wî daniye pêşiya me dişopînin. Hêvî dikin ku Kurdistaneke azad serbixe. Em dixwazin Serok û girtiyên me yên li hefs û zindanan azad bibin.”
‘Em li pey Serokê xwe ne’
Dayika Yesûre Tûfan (56) jî wiha axivî: “Em li pey Serokê xwe ne. Serokê me bêje çi weke wî ye. Em dixwazin aştiyek pêk were. Em dixwazin ku dewlet jî gavekê biavêje ku dilê dayikan neêşe. Em dixwazin Serokê xwe di nava xwe de bibînin.”
‘Em banga Serokatî pir girîng dibînin’
Welatiyê bi navê Hecî Bayram Dogan (62) jî xwest ku di 21ê Adarê de aştiyeke mayînde pêk were û wiha got: “Her mirovek dixwaze aştiyek pêk were. Em bi hêvîne ku Newroza îsal wê bibe wesîleya aştî û wekheviyê. Em banga Serokatî jî pir girîng dibinin. Îşelah dewlet jî gavê biavêje. Weke cara din nebe.”
