Jinan li Amedê Meclisa Jinan a Zimanê Kurdî bi daxuyaniyêk çapemeniyê damezrandina xwe îlan kir. Jinan anîn ziman ku ew ê li dijî bişaftin û xwebişaftinê têbikoşin.
Zimanê Kurdî bi polîtîkayên bişaftine ya dewletê re rû bi rû ye. Li dijî van polîtikayan têkoşîna saziyên kurdî jî didome. Şaxên Egitim-Sen, Meclisa Jinan a Zimanê Kurdî li Amedê bi civînek çapemeniyê damezrandina xwe ragihand. Hevseroka MED-DERê Şukran Yakut, endamên MED-DER, ANKA-DER” Arî-Der, KURDÎGEH, Komeleya Ziman a Birca Belek û gelek jin tev li daxuyaniyê bûn. Li salona Egîtîm Senê pankarta “Sedsala Jine wê bibe Şoreşa Zimanê Kurdî” daliqandin û dirûşmên “Zimanê me nasnamaye me ye”, “Jin Jiyan Azadî” berz kirin. Rêvbera ANKA-DERê Emîne Oguz daxuyanî bi Kurmancî, Hevseroka MED-DERê Şukran Yakut jî bi Kirmanckî xwend.
‘Demildest gavên şênber bavêjin’
Emîne Oguz bi kurmancî daxuyanî da û wiha got: “Banga Rêberê gelê Kurd Birêz Abdullah Ocalanî a ji bo Aştî û Civaka Demokratîk a 27ê Sibatê ji hemû gelên Rojhilata Navîn û her wiha ji bo me jinan gelek girîng e. Ev bangawazî jiyaneke nû ku hemû rengên wê dihewîne pêşkêşî gelên Rojhilata Navîn û bi teybet jinan dike. Di heman demê de di sedsala 21an de li Tirkiye û Rojhilata Navîn deriyê avakirina civaka demokratîk vedike. Weke jinên dildarên Zimanê Kurdî em vê bangê dipejirenin û bi vê wesîleyê diyar dikin ku em ê hewcedariyên mîsyon û berpirsyariya ku vê bangê li me kiriye pêk bînin. Li gorî vê mîsyonê, ji bo ku em xebatên xwe bi rihê Banga Aştî û Civaka Demokratîk bidomînin û rêxistinbûna xwe xurt bikin, em jinên dildarên zimanê Kurdî Meclîsa xwe ya Jinê bi navê Meclîsa Jine Ya Zimanê Kurdî îlan dikin. Û bi vê minasebetê em bang li hikûmetê dikin: Divê di zûtirîn dem de şert û mercên xebata azad a birêz Ocalan bê temînkirin û gavên berbiçav ên ku birêz Ocalan destnîşan kiriye demildest bên avêtin.
‘Zimanê xwe ji bişaftin û xwebişaftinê xilas bikin’
Emîne Ozuz anî ziman ku ew jinên Kurd ku bi dehan salan e li hember zext û zordarîya arasteyî nasnameya xwe û zimanê xwe têkoşîneke bênavber didomînin destnîşan dikin ku ji bo ev sedsala nû bibe sedsala zimanê Kurdî û pêngava nû bi ser bikeve em dê têkoşîna xwe berfireh bikin û wiha axivî: “Em hewl didin hemû dildarên ziman ên jin di bin banê Meclisa Jinê ya Zimanê Kurdî de bînin ba hev û zimanê xwe ji çerxa bişaftin û xwebişaftinê xilas bikin. Em wek jinên Kurd bang li tevahiya gelê xwe dikin ku di vê sedsala nû de ku hem kapîtalîzm, hem netewedewlet û hem jî hemû hêzên din ên cîhanê dixwazin dizaynek nû bidin avakirin de divê em bi xwedîkerketina li ziman, nasname û çanda xwe mohra xwe li vê sedsalê bixînin. Divê êdî em bêstatubûnê qebûl nekin, ji van polîtîkayên bişavtin û xwebişavtina ku ji destpêka komarê ve li ser gelê me tê meşandin re bibêjin êdî bes e û di vê sedsala nû de bikaribin mafên xwe yên xwebûniyê bi dest bixnînin. Divê gelê Kurd ji bîr neke ku ziman, ruh û jiyan e, nasname û xwebûn e, bîr û hişmendî ye, rûmet û şanazî ye. Jê qerîna ji ziman jê qerêna ji rûmetê ye. Divê di serî de jinên Kurd hemû gelê me ji îro û pê ve li hemberî van polîtîkayên bişavtinê ku sed salê bi awayeke pergalî tên meşandin helwesta xwe nîşan bide û ji vê bişavtina sed salan re bibêje êdî bes e.”
‘Em ê li dijî her cure polîtîkayên bişaftinê têbikoşin’
Emîne Oguz, da zanîn ku ew jinên Kurd destûrê nadin ku tu hêz me ji ruhê me, ji nasname û ji zimanê me bê par bihêle û wiha lê zêde kir: “Wek Meclisa Jinê ya Zimanê Kurdî, em dê li hember her cure polîtîkayên bişaftinê têbikoşin, rola dîrokî ya jinê ya di hêla ziman de hêzdar bikin û ji bo zimanê Kurdî bighîje statuya makezagonî xebatan bimeşînin. Em jinên ku ji bo aştiya civakî her tim di refên herî pêş de têdikoşin em ê têkoşîna xwe ya ji bo zimanê Kurdî jî bidomînin.”
Emîne Oguz, xal bi xal bernameya têkoşîna ku dane pêşiya xwe wiha rêz kir:
“• Em dê mafê perwerdehiya bi zimanê dayîkê biparêzin: Ji bo zimanê Kurdî ji pêştibistan heta zanîngehê bibe zimanê perwerdehiyê em dê xebatan bimeşînin.
• Em dê hilberîna ziman a jinan teşwîq bikin: Em dê di qadên wek wêjeya Kurdî, huner, medya û xebatên akademîk de berbiçaviya jinan zêde bikin.
• Em dê bikaranîna zimanê Kurdî ya di qadên gelemperî de berbelav bikin: Em dê bi awayekî azad bikaranîna zimanê Kurdî ya di saziyên fermî, medya, kuçeyan û di jiyana civakî de teşwîq bikin.
• Em dê hişmendiya Ziman Zêde Bikin: Ji no berbelavkirina axaftina Kurdî ya di nav malê de, di nav malbatê û di nav civatan de em dê xebatên hayjêbûnê saz bikin.
• Em dê hevkariya navneteweyî hêzdar bikin: Em dê bi têkoşînên ziman ên tevgerên jin û gelên li welatên cuda re li cihekî hevpar bên ba hev û hevkariyê mezin bikin.
JI BO PARASTIN Û JIYANDINA ZIMÊN, NASNAME Û ÇANDA XWE BANGA HER JINÊ DIKIN KU BEŞDARÊ BÊ TÊKOŞÎNÊ BIBE!
Her peyva zimanê kurdî berxwedana me ye!
Ger Kurdî bijî, dê gelê me bijî!
Ger Kurdî Azad Bibe Dê Jin Azad bibe.”
