Berdana Mehmet Salîh Erden ku 30 sal in di girtîgehê de ye înfaza wî cara 3yemîn hat dirêjkirin. Dadgehê biryara lîjneyê şaş dît û îtîraza parêzeran qebûl kir. Lê tevî vê yekê jî Lîjneya Çavderiyê biryara dadgehê binpê kir û înfaza Erden taloqî 10ê Adara 2026an kir.
Girtiyê siyasî Mehmet Salîh Erden ku di girtîgeha Hejmar 1an a Xarpêtê de ragirtiyê tevî ku cezayê xwe qedandiye jî cara 3yemîn berdana wî wî hate taloqkirin. Mehmet Salîh Erden ku di 11 Çileyê de cezayê xwe temam kiribû ji ber biryarên Lîjneya Rêveberiya Çavderiyê û Îradeyê ya Girtîgehê nayê berdan. Tevî ku Dadgehê di biryara xwe ya 19ê Tebaxê de biryara dirêjkirina înfazê şaş dîtibû û îtîraza parêzeran qebûl kiribû jî lê belê Lîjneya Rêveberiya Çavderiyê ya Girtîgehê di 10ê Îlonê de berdana Erden 6 mehên din dirêj kir û taloqî 10 Adarê 2026an kir. Parlamentera Partiya Wekhevî û Demokrasiyê ya Gelan (DEM Partî) a Şirnexê Newroz Uysal Aslan tekildarî taloqkirina berdana Erden, serdana Seroktiya Komîsyonê ya Lêkolînkirina Mafê Mirovan a Meclîsê kir û ji bo Wezareta Dadê bibersivîne jî pêşniyazpirs pêşkêş kiribû.
Tevî ku pûana Mehmet Salîh Erden 44 bû û ji bo “Rewşa baş” sûdê werbigire têr dikir jî Lîjneya Çavdêriyê û Îdareyê di 11 Tirmehê de bi hinceta, “tev li greva birçîbûnê bûye”, “cezayê dîsîplîne hene” û “ne poşman e” berdana Erden taloq kiribû. Li ser vê yekê parêzeran jî îtîraz kiribû. Piştî îtîraza parêzeran, dadgehê di 19ê Tebaxê de biryar dabû û îtîraza parêzeran qebûl kiribû û xwestibû Lîjneya Çavderiyê û Îdareyê biryara xwe li ber çavan derbas bike. Di biryara dadgehê de destnîşan kiribû ku cezayê dîsîplînê û mayina di qawişên girtiyên siyasî de nabe sedema taloqkirina înfazê. Dadgehê diyar kiribû ku girtî Erden li gorî raporan û hemû qaîdeyan tevgeriyaye û di biryara lîjneyê de nakokî hene.
Lîjneya Çavderiyê biryara dadgehê binpê kir
Lê tevî van biryarên dadgehê jî Lîjneya Rêveberiya Çavderiyê di 10ê Îlonê de careke din kom bû û hemû biryarên ku dadgehê gotibû nabe sedema taloqkirina înfazê weke hincet nîşan da û berdana Erden 6 mehan dirêj kir. Bi vê biryarê Lîjneyê re biryara dadgehê jî hate binpêkirin û berdana Erden taloqî 10ê Adara 2026an hate kirin.
Pirsên Lîjneyê ji Erden kiribû jî li dijî biryarên dadgehê bû. Pirsên lîjneyê ji Erden kirine ev in: “Ji ber endamtiya rêxistinê hûn ketin girtîgehê an? Hûn çima tev li rêxistinê bûn? Yên ku derbarê te de îfade da sivîl bû an endam bû, di navbera we de tu pirsgirêk hebû an? Cezayên te yên dîsîplînê hene an na? Sedema cezayên dîsîplînê çi ne? Tu kîjan qawîşa siyasiyan de dimînî, dema tu hatî jî di wir de bûyî an? Dema tu di qawîşa siyasiyan de bî gelo divê hûn agahî û fermanê rêxistinê pêk bînî? Di malbata te de kesek bi rêxistinê re di nav pêwendiyê de heye an na? Sedema cezayên dîsîplînê gelemperî grava birçîbûnê ye, çima ewqas zêde ye? Ew çalakiyên takakesî ne an? We çalakiyên PKKê rewa didîtin an, tu derbarê bûyerên berê pêk hatine de çi difikirî? PKK rêxistineke terorê ye an na? 30 sal şûnve tu poşmanî an na?”
Parlamenter Newroz Uysal Aslan serdana Komîsyona Mafên Mirovan a Meclisê kir û rewşa Salîh Erden ragihandiye û xwestiye bê berdan. Her wiha Uysal pêşniyazname jî pêşkêşî Wezaretê Dadê Yilmaz Tunç kir û derheqê rewşa Erden de pirsan kiriye.
