Meşa KESKiyan ku dijî bêhiqûqiya KHKê dest pê kiribû di roja duyemîn de berdewam dike, meşvan gihiştin Dîlokê. Hevseroka Giştî ya KESKê diyar kir ku ev jî peywirek dide li ser milê wan û got: “Divê pirsgirêka KHKê ji holê rabe.”
Nûnerên Platforma Konfederasyona Sendikaya Karkerên Cameweriyê (KESK) ji bo kesên ku bi rêya KHKê ji karê xwe hatin dûrxistin, bi şîara “Em ê karê xwe paşve bistînin” ji Amedê ber bi Enqereyê ve dest bi meşê kirin. Meş di roja duyemîn de bi çoş berdewam dike. Meşvan roja duyemîn de ewilî çûn Semsûrê paşê gihîştin Dîlokê. Meşvan li Dîlokê ji aliyê nûner û endamên KESKê ya şaxa Dîlokê, partiyên siyasî û gelek kesan ve hatin pêşwazîkirin.
Di meşê de pankarta “Li dijî bêhiqûqî em dimeşin” vekirin, lolîpopên “KHKyî yên KESKî rûmeta me ne”, “Bijî berxwedana me ya maf û aştiyê” hatin vekirin û dirûşma “Bijî berxwedana kedkaran” hate berzkirin. Girse heta Qada Balikliyê meşiya û li wir daxuyanî hat danîn.
Daxuyanî ji aliyê Serokê Şaxa BESê ya Dîlokê Îsmet Karatay ve hat xwendin. Îsmet Karatay diyar kir ku ev 9 sal sal hevalên wa bêhiqûqî ji karê xwe dûr hatine xistin û ani ziman ku ew ji bo vegerin li ser karê xwe dimeşin.
‘Bêhiqûqi bi KHKê dest pê kir, paşê jî bi tayinkirina qeyûman re berdewam kir’
Paşê Hevseroka KESKê Ayfer Koçak axivî. Ayfer Koçak diyar kir ku berî 9 salan zilma KHKê dest pê kir û ev tişt anî ziman: “Bi hezaran hevalên me ji kar hat derxistin, 1300 hezar hevalên me di vê pêvajoyê de jiyana xwe dest da. Bêhiqûqi bi KHKê dest pê kir, paşê bi tayina qeyûm tayinî şaredariyan gelê kurd hat kirin. Di dawiyê de îro qeyûm tayinî tevahî şaredariyan Tirkiyeyê kirin. Îro li vî welatî malnişîn nikarin debara xwe pêk bînin, sedema ve politîkayên dijî hiqûqiyê. Wekî tê zanîn ku îro pêvajoyekî heye, ev jî peywirek dide li ser milê me. Em ê di avakirina aştiyê de cih bigirin.”
Piştî daxuyaniyê meşvan ber bi Mêrsînê ve rê ketin.
