Riha – Meşa TJAyê di roja 4emîn de berdewam dike. Jinên ku dimeşin destnîşan kirin ku meşa wan bicoş derbas dibe û wiha gotin: “Gel jî dixwaze Serokatî demildest azad bibe di nava wan de cih bigire.”
Tevgera Jinên Azad (TJA) bi dirûşma “Em bi hêviyê ber bi azadiyê ve dimeşin” di 1ê Cotmehê de ji Amedê ber bi Enqereyê ve meş da destpêkirin. Meş di roja sêyemîn de li navçeyê Curnê Reş, Xelfetî û Bîrecîkê bi dawî û jinan berê xwe dan Dîlokên. Jinên ku bidirûşm, stran û tilîliyan heta qadeke Taxa Vatanê ya Dîlokê meşiyan ji aliyê hezaran kesan ve bi pankarta “Daxwazên we daxwazên me ne. Hûn bi xêr hatin” hatin pêşwazî kirin bi awayekî bicoş hatin pêşwazîkirin.
‘Gel pir bicoş me pêşwazî dike’
Endama Komeleya Dema Jinê Derya Aslan diyar kir ku daxwaza wan a sereke azadiya Rêberê Gelê Kurd Abdullah Ocalan e û wiha got: “Gel me pir xweş pêşwazî dike. Herkes ji bo vê meşa me gelek bi coş û moral in. Tişta me dît herkes amade ye ji vê pêvajoyê re. Daxwaza herkesê ew e ku Serokatî demildest azad bibe. Bi taybetî Xelfetiyê got divê em Serokatî bi awayekî fizîkî di nava xwe de bibînin. Heta ku daxwazên me pêk werin em ê xebatên xwe bidomînin.”
‘Hemû jinên Kurdistanê dimeşin’
Semîre Demîr Elkût a ji Mêrdînê beşdarî meşê bûye jî destnîşan kir ku ji bo aştiyeke birûmet dimeşin û wiha got: “Hemû jinên Kurdistanê ji kîjan nasname, olî be em civiyan e em di bin sîwana TJAyê de dimeşin. Armanca meşa me ew e ku ew qeyd û bendên li aştiyê hatine xistin em wan bişkînin li ser rêya heqîqetê em pergaleke nû ava bikin. Jinan ji aliyê manîfestoya Serokatî ve xwe perwerde kirine. Jin gihiştiye astekê ku karibe civakê jî azad bike û tevahî Komara Tirkiyeyê azad bike.”
‘Jinê dest avêtiye çi azad bûye’
Dayika Emîne Adibellî ya ji Edeneyê jî tev li bû destnîşan kir ku ji bo azadiya Rêberê Gelê Kurd ABdullah Ocalan tev li meşê bûye û wiha axivî: “Baweriya me heye. Jinê dest avêtiye çi azad bûye. Divê em jin ji pêşniyarên Serok re hazir bin. Em ê ziman, çand û hunera xwe ava bikin. Me li her bajarî jî civîn çêkir gelek xweş bû. Her jin dixwazin ji bo azadiya Serok û girtiyan dixwazin beşdarî meşê bibin.”
‘Ji bo mafê hêviyê Serokê Gelan dimeşin’
Hevseroka DEM Partiyê ya Mêrdînê Nîlufer Elîk Yilmaz jî qala meşa xwe ya sê rojan kir û wiha got: “Jinan em pir baş pêşwazîkirin. Em bi vê meşê gelek keyfxweş in. Ev meş ji bo mafê hêviyê yê Serokê Gelan Birêz Abdullah Ocalan û hevalên girtî pêk were dimeşin.”
‘Em aştiyeke birûmet dixwazin’
Dayika bi navê Aynûr Taş ku ji Amedê beşdar bûye jî derbarê meşê de ev tişt gotin: “Ji bo aştiyê, Serokatî û hemû girtiyên azadiyê em dimeşin. Em aştiyeke birûmet dixwazin. Em dixwazin dewlet jî gavekê biavêje. Em dayik aştiyê dixwazin bes e bila êdî kes negirî.”
‘Gundê Amarayê hêzek da me’
Endama DEM Partiyê ya Geverê Gulê Îlîş jî anî ziman ku ji bo mafê hêviyê pêk were tev li meşê bûye û wiha got: “Di 27ê Sibatê de di pêşengtiya Rêberê Gelê Kurd de dest pê kir. Partiyê gav avêtin lê dewletê tu gav neavêtin. Ji ber vê yekê em hêvî dikin ku meşa be bibe wesîleyê aştiya fizîkî ya Rêberê Gelê Kurd Birêz Abdullah Ocalan. Em çûn gundê Amarayê jî hêzeke xurt da me. Heta ku Birêz Abdulah Ocalan azad bibe dê ev meşa me bidome.”
‘Gel jî aştiyeke mayînde dixwaze’
Meral Kaptan a ji Êlihê tev li meşa azadiyê bû jî wiha got: “Armanca me ya tevlibûna meşê ew e ku rêzdar Ocalan azad bibe û deriyê hemû girtîgehan were vekirin û hemû hevalên me yên girtî werin berdan. Êdî polîtîkayên qirêj ên asîmîlekirin. Tunehesibandinê li vê erdnîgariyê pêk nayê. Divê dewlet jî dest ji van polîtîkaya xwe berde. Em vê daxwaz dikin. Daxwaza gel jî ew e ku aştiyeke mayînde li vê erdnîgariyê çêbibe ye ku hemû gel weke hev bijîn.”
