Amed – Welatiyên ku tev li Newroza Erxeniyê bûn xwestin Rêberê Gelê Kurd Abdullah Ocalan were berdan ku muzakere berdewam bikin û diyar kirin ku dewlet ji aliyekê dibêje aştî û aliyê din êrişî Kobanê dike û gotin: “Ev yek nayê qebûlkirin.”
Newroza îsal li bakurê Kurdistanê bi dirûşma “Rêbertiya Azad, Civaka Demokratîk” tê pîrozkirin. Welatiyên ku tev li Newroza Erxeniyê bûn têkildarî banga Rêberê Gelê Kurd Abdullah Ocalan û êrişa li dijî gundê Berxbotan ê Kobanê ku 9 welatiyan jiyana xwe ji dest dan axivîn.
Welatiyê bi navê Mehmet Ûmûtlî (59) bi bîr xist ku 40 sal in şerek li herêmê didome û wiha got: “Rêberê Gelê Kurd ji bo vî şerî bisekine gavek avêt. Hewceye mirov wî bi Xelata Aştiyê ya Nobelê bi Xelat bike. Ji niha şunde peywîr dikeve ser milê Meclisê. Ji vir û şunde divê gavan biavêjin ku pêşiya vê pêvajoyê vebe. Heke tişteke wiha bibe Tirkiye dê di Rojhilata Navîn de bibe welatî girîng, xweş û azad. Ji ber vê yekê em ji rêzdar Abdullah Ocalan re pir spas dikin. Em piştgiriyê didin pêvajoya wî daye destpêkirin. Rêberê Gelê Kurd pêvajo zelal kir. Dinya pê da hesandin.”
‘Divê rêzdar Ocalan were berdan ku muzakereyan bi xwe bimeşîne’
Mehmet Ûmûtlî destnîşan kir ku ji bo ku pêvajo di rê de biçe divê muzakere çêbibin û wiha domand: “Divê rêzdar Abdullah Ocalan were berdan ku vê muzakareyê bi xwe bimeşîne. Di cihekî teng de barê wî giran dibe. Heke pêvajoyeke qanûnî dest pê neke û pêşiya wî venekin nabe. Ji niha şunde meşandina pêvajoyê ketiye ser milê dewletê.”
‘Ev yek di exlaqê aştiyê de nîn e’
Mehmet Ûmûtlî nerazîbûn nîşanî qetilkirina welatiyên li gundê Berxbotan ê Kobanê da û ev tişt gotin: “Di nava hikumeta nû û HSDê de peymanek hate îmzekirin divê ev pirsgirêkên wiha bên çareserkirin û şer jî raweste. Şer ji pêvajoyê re ne bi xêr e. Ev yek di exlaqê aştiyê de nîn e.”
‘Êdî ji vê xwîna tê rijandin re bes e’
Naciye Guldiken (65) jî xwest ku aştî pêk were û wiha got: “Êdî ji vê xwîna tê rijandin re bes e. Êdî ji çavên dayikan hêsir nayên. Dilê dayikan pir bi kul e.” Guldîken diyar kir ku Newroza îsal xweş e û wiha domand: “Bi saya Serok îsal Newroz pir xweş e. Piştî gotinên wî xweştir bû.”
‘Hewce ye Tirkiye gavekê biavêje’
Welatiyê bi navê Abbas Karakoyûn (52) jî diyar kir ku banga Rêberê Gelê Kurd Abdullah Ocalan di cîhanê de deng veda û wiha got: “Birêz Serok ji ber xwendinên xwe astengiya ku Tirkiye ketiyê dibîne lê Tirkiye vê nabîne. Serok dibê ‘ev şer bila êdî bisekine û xwîn nerije’. Dema du kes hatin bahev û li hev kirin divê şer raweste. Balafir ranebin. Hewce ye Tirkiye gavekê bi pêş de biavêje. Tu ferqa Rojava û Bakur tune ye. Balafiran rake ser wan ev ne aşti ye. Ev şertê aştiyê jî nîne.”
‘Serokê me aştiyê dixwaze lê dewlet tu gavan navêje’
Dayika bi navê Nûrten Gul (55) bal kişand ser banga Rêberê Gelê Kurd Abdullah Ocalan û wiha got: “Got bila aştî û yekitî pêk were. Bila kes nemire. Serokê me aştiyê dixwaze lê dewlet tu gavan naavêje. Bila demildest gavan biavêje. Yekane daxwaza me ew e ku serokê me were nava me û aştî pêk were.”
‘Bila aştî û azadî were ku hemû gel bi hev re bijîn’
Welatiyê bi navê Abdulsamed Gul (53) jî diyar kir ku tevî banga Rêberê Gelê Kurd tu gav nehatin avêtin û wiha got: “Em dixwazin ku dewlet gavê biavêje û pêvajoyeke aştiyê dest pê bike ku herkes rehet bibe. Bila aştî û azadî were ku hemû gel bi hev re bijîn. Em naxwazin xwîn birije û kes bigirî. Dewlet ji aliyekê dibêje aştî li aliyê din jî êrişî Kobanê dike û 9 kesan jiyana xwe ji dest dan. Êdî bes e.”
