Konseya Mafên Mirovan a Neteweyên Yekbûyî rayedarên Tirkiyeyê hişyar kir û xwest bêhiqûqiyê bi dawî bikin. Berdevka Komîseriya Bilind a Konseya Mafên Mirovan a NYê Liz Throssell xwest kesên di rojên dawî de hatine girtin demildest bêne berdan.
Konseya Mafên Mirovan a Neteweyên Yekbûyî (NY) têkildarî destwerdana polîsan a li çalakiyên şermezarkirinê yên li dijî girtina Şaredarê Bajarê Mezin ê Stenbolê Ekrem Îmamoglû û girtinan daxuyaniyek da. Berdevka Komîseriya Bilind a Konseya Mafên Mirovan a NYê Liz Throssell nerazîbûneke tund nîşanî destwerdana polîsan da û xwest, kesên hatine girtin tavilê bêne berdan û wiha got: “Şaredarê Stenbolê yê bi rêyên demokratîk hate hilbijartin Ekrem Îmamoglû jî di nav de ku bi sûcdariyên nelirê re rû bi rû ye, ji wezîfeyê hate dûrxistin, herî kêm 92 kes hefteya derbasbûyî ji aliyê meqamên Tirk ve hatin binçavkirin. Em ji vê yekê bi fikar in.”
Lîz Throssell di daxuyaniyê de wiha berdewam kir: “Binçavkirin li welêt bû sedema xwepêşandanan û ev xwepêşandan li sê bajaran bi qedexeyên giştî yên neqanûnî re hatin pêşwazîkirin. Di dema xwepêşandanan de herî kêm 9 xebatkarên medyayê zêdeyî hezar kes hatin binçavkirin. Kesên ku ji ber mafên xwe bi rengekî rewa bi kar anîn hatin binçavkirin, divê tavilê û bê şert bêne berdan.”
Lîz Throssell bang li rayedaran kir ku li gorî hiqûqa navneteweyî, mafên azadiya kombûnê û azadiya îfadeyê tevbigerin.
