Wan – Li Taxa Akkopruyê ya navçeya Rêya Armûşê ya Wanê, li ser talîmata qeyim, sînorên Parka Koşûyolûyê hat tengkirin. Her çend dar nehatibin rakirin û makîneyên kar niha ji qadê vekişiyabin jî, kêmkirina qada keskayî ya ji bo firehkirina rê dibe sedema nerazîbûnan.
Di nava qerebalixiya bajaran û di navber blokên betonî de, qadên keskayî ne tenê xeml in, ew cihên bêhnvedanê û mafê jiyanê yê her welatiyekî ne. Îro ku bajarên me roj bi roj bi betonê tên dorpêçkirin, parastina her darê û avakirina her parkê dibe têkoşînek ji bo tenduristiya civakî. Her wiha qadên kesk ji bo zarokan cihê lîstikê, ji bo pîr û kalan cihê aramiyê û ji bo xwezayê jî stargeha dawî ne. Lewma, parastina qadên keskayî ne tenê peywireke şaredariyan e, di heman demê de berpirsiyariyeke mirovî û ekolojîk e.
Sînorên keskahiyê paşve hatin kişandin
Di xebatên ku wekî “sererastkirina rê” hatine destpêkirin de, sînorên Parka Koşûyolûyê hatin guhertin. Li parka taxê, ji bo çêkirina rêya asfaltê qada kesk hate kêmkirin. Her çend darên parkê hîn li şûna xwe bin jî, tengkirina parkê nîşan dide ku polîtîkayên qeyim li şûna parastina qadên civakî, qadên betonî firehtir dike.
Makîne çûn, xerabûn ma
Makîneyên kar niha li wir nîn in, lê bandora xebatan li ser parkê diyar e. Nêzî sê çar meh in li gelek deverên parkê û rêyên derdora wê, xerabûn û çalên kûr hîn jî li benda çêkirinê ne. Welatiyên li herêmê, her çend ji ber fikarên siyasî nexwazin bi fermî daxuyanî bidin jî, li dijî vê yekê nerazî ne.
