Qeyûmê ku tayînî Şaredariya Bajarê Mezin a Wanê hat kirin, karê ewil li şûna paqijiya kolanan bike, tevahiya konteynirên çopê kom kir û konteynir kirin mîna çopê. Nûnerên Şaredariyê yên DEM Partiyî destnîşan kirin ku qeyûm bi komkirina konteyniran bi qasî 13 milyon lîreya zerar daye şaredariyê.
Bi ser tayînkirina qeyûm a li Şaredariya Bajarê Mezin a Wanê re 5 roj derbas bûn. Çalakiyên protestoyî yên li taxan hêj berdewam in. Li gorî nûçeya Nûçegîhanê Ajansa Mezopotamya (MA) ya Adnan Bîlen, qeyûmê li şaredariyê hatiye tayînkirin weke karê ewil tevahiya konteynirên çopê yên li navenda bajar kom kir û avêt qadeke li derveyî bajar. Tevahiya konteynirên çopê yên şaredariyên DEM Partiyî standin, li vir kirin xurde. Hemû hewldanên şaredariyên Rêya Armûşê û Artemêtanê yên DEM Partiyî bêencam man. Ji ber ku konteynirên çopê hatine komkirin, xelkê navçeyê çopê xwe diavêje kolanê.
Li navçeya Artêmetanê 600 konteynirên çopê û li Rêya Armûşê jî zêdetirî hezar heb hatine komkirin. Li gorî agahiyên ji rayedarên şaredariyê hatine bidestxistin; heta niha bihayê 13 milyon lîreyan konteynirên çopê kirine xurde.
Şaredariyan ji walîtiyê re nivîs şandin û sedema vê sepanê jê pirsî. Lê belê bersiveke fermî ji nivîsan re nehate dayin. Ajansa Mezopotamyayê (MA) qada konteynirên çopê lê hatine komkirin kişand.
Wêne: Adnan Bîlen
