Amed – Rêveberê YEWKURDê Jêhat Rojhilat da zanîn ku di navbera 2-5ê Gulanê de 1emîn Rojên Pirtûkan ên Şaredariya Erxeniyê tê lidarxistin û got: “Kesên ku dizanin niha zimanê wan di bin xetereyê de ye, bila bên xwedî li pêşengehê derkevin.”
Di pêşengtiya Şaredariya Erxeniyê de dê di navbera 2-5ê Gulanê de bi gelek sazî û dezgehan re li Park Orman a Yenîşehîrê ya navçeya Erxenî ya Amedê 1emîn Rojên Pirtûkan a Şaredariya Erxeniyê bê lidarxistin. Di pêşengeha ku 32 weşanxane û 50 nivîskar dê tev li bin de gelek panel, gotûbêj, konser û aktîvîteyên cuda bên lidarxistin. Rêveberê Yekitiya Weşangerên Kurd (YEWKURD) Jêhat Rojhilat têkildarî 1emîn Rojên Pirtûkan ên Erxeniyê axivî.
‘Ji bo ku çand û zimanê kurdî di nava gel de xuya bike ev xebat danîne pêşiya xwe’
Jêhat Rojhilat da zanîn ku weke Weşangerên Kurd ji bo ku çand û zimanê kurdî di nava gel de xuya bike xebateke wisa dan pêşiya xwe û wiha got: “32 weşanxane û 50 nivîskar dê beşdarî pêşengehê bibin. Ligel rojên îmzeyan ev hejmara nivîskara digihe sedan jî. Ji ber wê ev ji bo Erxeniyê gaveke girîng e û cara ewil pêk tê. Bi taybetî hevalên me yên Egîtîm Senê xebateke baş kirin. Odeya Bazirganî û Senayiyê ya Amedê (DTSO), Şaredariya Bajarê Mezin a Amedê, Şaredariyên Peyas, Hênê, Pîran, Erxenî gelek sazî di nav vê xebatê de hene jî piştevaniya vê pêşengehê dikin. Di vê çarçoveyê de dê li navçeya Hênê şano were lîstin, li navçeya Pîranê wê li ser zaravayê kirmanckî yê kurdî panelên me hebin. Mamoste Suleyman Yilmaz û Hecî Ozkal dê tev li bin. 16 gotûbêj dê bên lidarxistin. 8 heb bi kurdî 8 heb bi tirkî ne. Ew jî an niştecihên Erxeniyê ne an jî tên nasîn û bi tirkî dinivîsin. Me xwest li Erxeniyê çiqas nivîskar û rewşenbîr dûr bin jî werin di nava wê pêvajoyê de cih bigirin.”
‘Daxwaza me ew e ku em xwe bigihînin gel’
Jêhat Rojhilat destnîşan kir ku daxwaza wan ew e ku xwe bigihînin gel û wiha domand: “Em dixwazin ji gel re bêjin ku ev xebatên li ser kurdî hene. Carna hin kes tên pirtûkxaneyê ji me pirs dikin em dibêjin li ser kirmanckî kurmancî ev qas pirtûk hatine nivîsandin şaş dimînin. Xebatên li ser pirtûkên kurdî hene, arşîveke baş çêbûye. Dibe ku îro qedr û qiymetê vê arşîvê pir tune be lê sibê dê bêtir baş bê fêmkirin.”
‘Werin em weke mihrîcanekê vê pêşengehê derbas bikin’
Jêhat Rojhilat wiha bang li pirtûkhezan kir: “Kesên kurd bin û dizanin niha zimanê wan di bin xetereyê de ye. Bila bên xwedî li pêşengehê derkevin. Da ku weşangerên kurdan li ser piyan bimînin û xebatên xwe bidomînin. Bi taybetî gelê Erxeniyê û yên navçeyên derdora wê vedixwînin pêşengehê. Kesên ku derfeta wan hebe bila kerem bikin werin. Em weke mihrîcanekê vê pêşangeha xwe derbas bikin.”
