Şirnex – Hevserokê PYDê yê berê Salih Muslim tekildarî geşedanên li Bakur û Rojhilatê Sûriyeyê bi lêv kir ku li Minbicê agirbest hatibe ragihandin jî li herêmên din êriş hene û wiha got: “Daxwaza me ew e ku li hûndirê Suriyeyê em hemû nasname bikaribin bi hev re bijîn. Lê heke wisa nebe dawiya Suriyeyê dijwar e. Ji bo vê jî divê em ji her tiştî re amade bin.”
Ji 26ê Mijdarê vir ve li Sûriyeyê êriş û şer ranewestiyane. Piştî Heyet Tahrîr El Şam (HTŞ) ket Şamê û dawî li hikumeta Esad anî rêveberiyeke nû li Sûriyeyê hate damezrandin. Ji aliyê din ve jî komên paramîlîter ên giredayî dewleta tirk di serî de li Minbicê, êrişên xwe yên li dijî herêmên Rêveberiya Xweser a Bakur û Rojhilatê Sûriyeyê berfirehtir kirin. Tirkiyeyê jî bi SÎHAyan êrişî gundên Kobanê û Eyn Îsayê kirin û di encamê de zarok jî di nav gelek welatiyên sivîl hatin qetilkirin. Êrişên komên paramîlîter ên giredayî dewleta tirk ku ji 27ê Mijdarê ve berdewam dikin di van rojên dawî de berfirehtir bûn û gelek sivîl ji aliyê van koman ve bi awayekî hovanê hatin kuştin.
Ji ber behtir welatiyên sivîl neyên qetilkirin Hezên Sûriyeya Demokratîk (HSD), Meclisa Leşkerî ya Minbicê xwe bi paş ve kişandin kişand û bi komen çekdar re agirbest ragihand. Piştî agirbestê êrişên li ser Minbicê rawestiya bin jî di serî de li Kobanê li bajarên Bakur û Rojhilatê Sûriyeyê êrişên komên çekdar ên giredayî Tirkiyeyê berdewam dikin. Hevserokê Partiya Yekitiya Demokratîk (PYD) yê berê Salih Muslim geşedanên li herême diqewimin ji Ajansa me ya Welat re nirxandin.
‘Bi rêya koalîsyona navneteweyî agirbest hat ragihandin’
Salih Muslim anî ziman ku agirbesta di navbera komên paramîlîter û HSDê de bi rêya koalîsyona navneteweyî pêkhatiye û ev tişt gotin: “Ji 27ê Mijdarê vir ve êriş li ser me nesekinîbûn. Êrişên Minbicê jî di demên dawî de zêde bûn. Yên ku êriş dikin jî Arteşa Netewa Sûriyeyê (ANS) ku giredayî Tirkiyeyê. Ew û HTŞ ne wekhev in. Yên ku dixwazin Kurdan tune bikin jî ew in. Li Minbicê bi rojan êriş hebûn. Ji ber ku êrişî welatiyên sivîl kirin agirbest hat ragihandin. Niha bi rêya koalîsyona Navneteweyî agirbest berdewam dike li Minbicê. Agirbest tenê li Minbicê heye. Li herêmên din êriş û şer berdewam dikin. Li Kobanê û herême bi dron û topbaranan êriş dikin. Hezên me yên lêşkerî jî ji bo sivîl neyên qetilkirin ji Minbicê vêkişiyan û tenê li wir agirbest heye. Em di wê heviyê de ne ku li tevahiya Suriyeyê agirbestek bê ragihandin û ev şer û êriş rawestin.”
‘Hevî dikin di demên pêş de li hev bikin’
Salih Muslim tekildarî HTŞê ku rêveberiya Sûriyeyê bi dest xist jî, bi lêv kir ku ew dixwazin ji bo pêşeroja Sûriyeyê bi HTŞê re li hev bikin û axaftina xwe wiha domand: “Li dijî me tu gotinên xirab û êrişên HTŞa ku dawî li hikumeta Şamê anî çênebûn. Qala biratiyê û jiyana hevbeş dikin. Ya ku ji me re hatiye gotin êrişî herêmên Kurdan nakin. Em hevî dikin di demên pêş de em bi wan re li hev bikin. Her çiqas ji aliyê fikrî ve em li hev nekin jî em dikarin bi hev re bijîn. Hewldanên koalîsyona navneteweyî jî hene ku em bi wan re bikevin diyalogê û bikarin bi hev re bijîn. Heke soza ku didin pêk bînin xetereyên wan jî li ser herêmên Bakur û Rojhilatê Sûriyeyê wê kêm bibin. Em ê bikarin bi hev re bijîn. Lê soza xwe pêk neynin û êrişî me bikin em jî destê xwe nagirin. Parastina rewa mafê me ye û em ê xwe biparêzin.”
‘Em ê bi xwe parastina rewa biparêzin’
Salih Muslim destnîşan kir ku çareseriya li Sûriyeyê jiyana hevpar e û heke êriş berdewam bikin xetereyên mezin li pêşiya Suriyeyê ne. Salih Muslim wiha dawî li axaftina xwe anî: “Yên ku di navbera me û van komên çeteyan de diyalogê ava dike koalîsyona navneteweyî ye. Yanî Amerîka bixwe ye. Aşkera nabêjin lê li pişt perdeyê û bi dîplomasiyê zextê li wan dikin ku êrişên xwe rawestînin. Lê hewldanên wan ên sekinandina êrişan hene. Ji bo pêşerojê daxwaza me ew e ku di hûndirê Suriyeyê de em hemû bikarin bi hev re bijîn. Lê heke wisa nebê dawiya Sûriyeyê dijwar e. Wê ber bi xetereyên mezin ve biçe û parçebûnên mezin wê pêk werin. Ji bo wê jî divê em ji her tiştî re amade bin. Em ê xwe bi parastina rewa biparêzin. Em hevî dikin ku di demên pêş de bi hikumeta Şamê re li hev bikin ku ji bo pêşeroja Sûriyeyê giştî baş bibe.”
