Girtî Seracettîn Yuksekbag ê ku 31 sal û 6 mehan di girtîgehê de ma, hate berdan. Seracettîn Yuksekbag li pêş girtîgehê axivî û got: “Em ê bi ser bikevin.”
Girtî Seracettîn Yuksekbag ku li Girtîgeha Tîpa T a Hejmara 1an a Rihayê dihate ragirtin, piştî 31 sal û 6 mehan girtî ma, hate berdan. Seracettîn Yuksekbag ku di sala 1993yan de hate girtin, Dadgeha Ewlehiya Bilind (DGM) a Amedê cezayê muebedê lê birî. Tevî ku Seracettîn Yuksekbag cezayê lê hatibû birin di 26ê Mijdara 2023yan qedand jî berdana wî salek û nîvan hate taloqkirin.
Malbata Seracettîn Yuksekbag, Şaxa Komeleya Hiqûqnasên Ji Bo Azadiyê (OHD) ya Rihayê, Tevgera Jinên Azad (TJA), Rêxistinên Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Partî) a Rihayê û gelek kesan Seracettîn Yuksekbag pêşwazî kirin.
‘Em ê têkoşîna xwe bidomînin’
Yuksekbag ê li pêş girtîgehê axivî, wiha got: “Divê ji bo doza xwe me bedel dabûya, me da. Em ê ji niha û pê ve jî berpirsyartiya xwe pêk bînin. Em ê têkoşîna xwe bidomînin. Ez hêvî dikim ku em ê serbikevin.”
Seracettîn Yuksekbag kî ye?
Seracettîn Yuksekbag ku di sala 1993yan de li navçeya Misirc a Sêrtê tê girtin ji aliyê Dadgeha Ewlehiya Bilind (DGM) a Amedê ve cezayê hefsê yê muebedê lê tê birîn. Yuksekbag ê dema girtî li gelek girtîgehan hate ragirtin, diviyabû di 29ê mijdara 2023yan hatibûya berdan lê Lijneya Çavdêrî û Îdareyê ya Girtîgehê berdana wî 6 meh û 2 rojan taloq kir.
Dû re Lijneya Çavdêrî û Îdareyê ya Girtîgehê di 25ê Hezîranê de bi hinceta Yuksekbag tev li çalakiya greva birçîbûnê û hin çalakiyên li girtîhê bûye û ji ber van cezayê dîsiplînê lê hatiye birin berdana wî 9 meh û rojekê taloq kir. Zext li Seracettîn Yuksekbag kirin ku têkildarî PKKê fikrên xwe bibêje. Lijneya Çavdêrî û Îdareyê ya Girtîgehê nirxandina berdana Seracettîn Yuksekbag taloqî 26ê Adarê kiribû. Seracettîn Yuksekbag îro hate berdan.
