Şirnex – Serdar Daniş û Ebûbekîr Denîz 24 sal berê li qereqola cendirmeyan winda bûn û agahî ji wan nayê girtin. Şuayîp Taniş anî ziman ku kujerê kurê wî Serdar Taniş û hevalê wî Ebûbekîr Denîz fermandarê cendirmeyan Levent Ersoz e û 24 sal in hîna nehatiye cezakirin.”
Di salên 1990an de li bakurê Kurdistanê bi hezaran kes hatin binçavkirin û pişt re jî hatin windakirin. Kesên hatin windakirin jî nehatin dîtin û kujerên wan jî nehatin cezakirin. Yek ji van kesên hatiye windakirin Serokê Partiya Demokrasiyê ya Gelan (HADEP) a Silopiyayê Serdar Taniş e û yek ji wan jî rêveberê HADEP a Silopiyayê Ebûbekîr Denîz e. Serdar Taniş û Ebûbekîr Denîz di 25ê çileya 2001an de hatin binçavkirin û piştrê jî tu agahî ji wan nehat girtin. Tevî guman hebûn ku di windakirina wan de Fermandarê Lîwayê yê Cendirmeyan a Şirnexê yê wê demê Levent Ersoz berpirsyare jî derbarê wî de tu lêpirsîn nehatin destpêkirin. Malbata Serdar Taniş û Ebûbekîr Denîz ji bo aqubeta wan bê zanîn û kujer bên cezakirin doz vekirin lê ji dozên hatine vekirin jî encam nehat standin. Malbatan serî li Dadgeha Mafên Mirovan a Ewropayê (DMME) da û DMMEyê di 2yê Tebaxa 2005an de Tirkiye mehkûm kir ku tazmînatê bide malbatan. Herî dawî jî parêzerên malbatan ji bo aqûbeta Serdar Taniş û Ebûbekîr Denîz bê zanîn û kujer bên ceza kirin di 7 Çileya 2020an de serî li DMMEyê dan. Lê heta niha DMMEyê tu bersiv nedane.
‘Fermandarê cendermeyan gef li me dixwar’
Serdar Taniş dema hat windakirin 2 zarokên wî yên biçûk hebûn. Tevî 24 sal bi ser windakirina Serdar Taniş û Ebûbekîr Denîz re derbas bûye jî aqubeta wan nayê zanîn. Bavê Serdar Taniş Şuayîp Taniş bi lêv kir ku tevî 24 sal bi ser windakirina zarokê wî re derbas bûye jî kujer nehatine cezakirin û ev tişt anîn ziman: “Serdar wê salê ji lêşkeriyê hatibû û nû zewicî bû. Wê demê mala me li Cizîrê bû. Piştî Serdar zewicî hat Silopiyayê. Piştî hat Silopiyayê ket nava xebatên partiyê. Pişt re bû serokê partiyê. Piştî Serdar bû serokê partiyê, Fermandarê Lîwayê yê Cendirmeyan a Şirnexê yê wê demê Levent Ersoz her tim gef li min dixwar. Rojekê bang li min kir û got werin qereqolê. Li wir Levent Ersoz ji min re got, ‘Em nahêlin hûn li vir partiyê vebikin.’ Gef li min dixwar, ‘Digot hûn vekin ez nahêlim hûn li vir bijîn.’ Min jî bertek nişan da. Serdar dişopandin. Wê rojê Serdar çûbû Amedê. Ji min re got dema Serdar hat bila bê qereqolê. Fermandarê Cendirmeyan ê Navçeya Silopiyayê Suleyman Can jî bang li min kir. Li wir Levent Ersoz dîsa telefonî wir kir û gef li min xwar û got, ‘Heke Serdar were Silopiyayê ez nahêlim ew bijî.”
Li qereqolê hate windakirin
Di berdewama axaftina xwe de Şuayîp Taniş anî ziman ku piştî kurê wî Serdar Taniş partiya HADEPê li Silopiyayê ava kir hate windakirin û wiha dirêjî da axaftina xwe: “Serdar çûbû PTTê ku telefonê li partiya xwe bike. Li wir texsiyek hatiye û xwestine wî li wesayîtê siwar bikin. Serdar jî bertek nişan daye û neketiye erebeyê. Serdar ji wan re dibêje heta wesayiteke fermî neyê ez siwar nabim. Piştî nîvro ji qereqola navçeyê Suleyman Can geriya û bang li Serdar kirin. Serdar jî çûbû qereqolê. Piştî wê rojê me ji qereqolê pirsî, gotin Serdar nehatiye vir. Ez jî li Suleyman Can geriyam û got, we bi sedan kes li Şirnexê winda kirin lê em dev ji vê bernadin. Pişt re me serî li serdozger da.”
‘Bila kujer bên ceza kirin’
Di dawiya axaftina xwe de Şuayîp Taniş anî ziman ku tevî kujerên zarokê wî diyar in jî nehatine ceza kirin û ev tişt gotin: “Piştre bûyer di çapemeniyê de jî belav bû. Pişt re ji me re gotin 2 cenaze li Kerboran in. Me DNAya xwe da. Lê heta niha me nekarî tu encamekê bi dest bixînin. Her sal em daxwaza cenazeyên xwe dikin. Heta niha ne aqubeta wan diyar bû. Ne goreke wan heye. Heta em sax in em dev ji doza xwe bernadin. Heta hestiyên wan nebînin em rihet nabin. Em dixwazin aqubeta zarokên me bê ronîkirin. Kujerên kesên hatine windakirin jî bên tespîtkirin û cezakirin. Tu sucekî zarokên me tune bû. Yên me faîl jî diyar in. Faîlê me Levent Ersoz e. Lê tevî vê yekê jî nehate ceza kirin. Tenê daxwaza me ew e ku hestiyên me bidin me û kujerên wan jî ceza bikin.”
