Navenda Nûçeyan – Şervanên YPGê û YPJê li dijî DAIŞê 134 rojan li ber xwe dan û li dijî DAIŞê Kobanê parastin. Piştî berxwedana xurt a YPGê û YPJê ya li dijî DAIŞê di 1ê Mijdarê de li gelek welatên cîhanê Kurd û dostên Kurdan daketin kolanan û piştgirî dan Kobanê.
* 11 sal berê gelên cîhanê li zêdetirî 40 welatan ji bo Kobanê daketin kolanan û bi yek dengî gotin “Bijî Berxwedana Kobanê”. Piştî ku di 1ê Mijdarê de li gelek welatên cîhanê gel ji bo piştgiriya Kobanê daket kolanan, ev roj wekî Roja Kobanê ya Cîhanê tê pîrozkirin.
1ê Mijdarê Roja Kobanê ya Cîhanê ye. DAIŞê di 14ê Îlona 2014an de êrîşî Kobanê kir. Xwest bi piştgiriya hikûmeta AKPê Kobanê dagir bike. Lê li dijî van êrîşan şervanên Kurd 134 rojan li dijî DAIŞê şer kir. Di şerê dijwar de êrîşên DAIŞê şikandin û DAIŞ têk bir. Vê têkoşîn û berxwedana şervanên Kurd bala hemû cihanê kişand. Li ser banga xwediyên Xelata Aştiyê ya Nobelê, akademîsyen, rewşenbîr, nivîskar û rêxistinên civakî yên demokratîk, 1ê Mijdara 2014an wek Roja Piştevaniya Cîhanê ya bi Kobanê re hat îlankirin.
Li ser vê yekê li tevahiya cîhanê bi taybet jî gel, çîn û beşên bindest û azadîxwaz yên civakê û jinên têkoşer bi çalakiyên curbecur piştgiriya xwe ji Kobanê û berxwedaniya bêmînak ya Kobanê re raber kirin. Berxwedan ji tax, çeper û kolanên Kobanê derbasî hemû cîhanê bû. Piştî gelên cîhanê ferq kirin ku DAIŞî, li dijî mirovahiyê xeterî û metirsiyeke mezin in, piştgirî dan têkoşîna Kobanê. Gelê cîhanê dîtin ku DAIŞî dijminê maf, azadî, demokrasî, hebûn û jiyana birûmet e li dijî DAIŞê derketin kolanan.
Li hemû kolan û qadên cîhanê, dil û mêjî di 1ê Mijdara 2014an de bû yek. Ji Japonya heya Efxanistan û Îranê, ji Latîn Amerîka heya Awisturalyayê, ji welatên Ewropayê heya Rojhilata Navîn bi yek dengî piştgî dan berxwedana Kobanê. Welatî û nûnerên rêxistinên civakî yên ku daketin kolanan, bawer kirin ku şervanên Kurd li Kobanê li dijî koletî û bindestiyê; azadî û rûmeta mirovahiyê parast. Dîtin ku jinên Kurd, şervanên azadiyê û gelê Kurd canê xwe kirin mertal û li dijî hovîtiya DAIŞê di nav şert û mercên bêmêzîn de şer kirin.
Rewşenbir û siyasetmedar destnîşan dikin ku yê ruhê berxwedana Kobanê xist meriyetê û rê li pêşiya 1ê Mijdarê Roja Kobanê ya Cîhanê vekir, fikrên Rêberê Gelê Kurd Abdullah Ocalan e.
Kurd ji çar aliyan herikîn Sînorê Kobanê
Li aliyê din piştî êrîşên DAIŞê yên li dijî Kobanê dest pê kir; gelê Kurd di serî de ji bajarên bakurê Kurdistanê, ji Başûr, Rojhilat berê xwe dan ser sînorê Kobanê û bi mehan li ser sînor nobet girtin. Gel bi şev û roj piştgirî dan şervanên YPG û YPJê û ew tenê nehiştin.
Şervanên Kurd berxwedana dirokî nîşan dan
Şervanên Kurd di şerê Kobanê de nîşan dan ku vîna mirov dema ku bi eşqa azadiyê re bibe yek, tu tişt, tu kelem û tu dijmin nikare pêşiya serketinê bigire. Bi vê berxwedana şervanên kurd re, gelên cîhanê di 1ê Mijdarê de li hemû kolanên cîhanê dirûşmeyên “Bijî berxwedana Kobanê” berz kirin. Şervanên YPJ-YPG, piştî vê rojê bêtir darbeyên giran li DAIŞe xistin û berxwedana xwe cîhanî kirin. Piştî gelên cîhanê di 1ê Mijdarê de daket kolanan, ev roj bû roja yekgirtin û hevgirtina gelan.
