Parlamenterê DEM Partî Sînan Çîftyurek di çalakiya li dijî qeyûm de balkişan ser êrişên li ser Bakur û Rojhilatê Suriyeyê û got: “Heke hûn wekheviyê dixwazin xweseriya Rojava û destkeftiyên kurdan nas bikin.”
Li Sêrtê çalakiyên li dijî tayinkirina qeyûm di roja 5an de berdewam dike. Parlamenterê DEM Partî Sînan Çîftyurek, endamê MYKê yê PÎA û parlamenterê DEM Partî Mehmet Kamaç, Serokê Giştî yê PÎA Ahmet Kaya, parlamenterên DEM Partî Berîtan Guneş Altin û Sabahat Erdogan Saritaş, hevşeredar Sofya Alagaş, Mehmet Kaysi endamên meclîsê yên şeredariyê û nûnerên rêxistinên bajêr beşdarî çalakiyê bûn.
Girse li parqa Orhan Dogan kombûn û bi pankarta “Qeyûm darbeya li dijî vîna gel e” heta şeredariyê meşiyan. Girseyê heta pêş şeredariyê stran strîn û dirûşmeyên; “Qeyûm talane berxwedan jiyane” ,”Kurdistan wê bibe goristan ji bo faşistan”, “Bijî berxwedana gelê kurd”, “Bêdengî mirine bêdeng nemîne”, “Bijî berxwedana Rojava” û “Jin jiyan azadî” berz kirin. Girseyê bi dirûşmeyan bertek nîşanî tayinkirina qeyûm û êrişên li ser Bakur û Rojhilatê Suriyeyê dan.
‘Em qeyûm nas nakin’
Welatiyên derdorê jî bi çepikan piştgiriya girseyê kirin. Girse piştî meşê li pêş şeredariyê kom bûn û guvend gerandin. Piştî govendê daxuyanî da. Ewilî endamê meclîsa Şeredariyê Aykut Savaşe bi erebî axivî û bertek nîşanî tayinkirina qeyûm da. Berdevkê demê yê Sêrtê Osman Ozturk jî destnîşan kir ku tayinkirina qeyûm li dijî hiqûqê ye. Endamê TMMOBê Firat Şîmşek, Serokê Baroyê yê Sêrtê Muhammed Alptekîn, Berîtan Guneş Altın jî diyar kir ku têkoşîna wan a li dijî tayinkirina qeyûman wê bidomê û ev tişt gotin: “Qeyûm nîşan dide ku demokrasî tune ye. Demokrasî tune be aştî jî tune ye. Em qeyûm nasnakin. Em ê bi dirûşmeya ‘Jin jiyan azadî’ li dijî qeyûm têkoşîna xwe bidomînin. Evşeredariya gel e û dê gel jî xwedî li şeredariya xwe derbikevin.”
‘Em vê xwişk û biratiyê qebûl nakin’
Parlamenterê DEM Partiyê Sînan Çîftyurek jî balkişand ser êrişên li ser welatiyên Bakur û Rojhilatê Suriyeyê û ev tişt anîn ziman: “Em kuştina şanoger Bavê Teyar û êrişa li dijî welatiyên sivîl şermezar dikin. Qeyûm tenê qeyrana siyasetê kor dike. Heke bixwazin aştî pêk were divê dev jî sepana qeyûm berdin. Qeyûm û êrişên li dijî kurdan xizmeta aştî nake. Heke tu gelê kurd nas neke, vîna wî qebûl neke wê çawa xwişk û biratî pêk were. Em vê xwişk û biratiyê qebûl nakin. Heke hûn xwişk û biratiyê dixwazin xweseriya Rojava û destkêftiyên kurdan nas bikin.”
Hevserokê Giştî yê PÎA yê Ahmet Kaya jî anî ziman ku qeyûm li dijî hiqûqê ye û got: “Qeyûm tayînî şûna min jî kirin. Tevî ku min ji wê dozê beraat kir jî dîsa peyvira min a berê nedan min. Ew yek jî nîşan dide ku qeyûm sepana li dijî hiqûqî ye. Em çawa gotinên Serokkomar bawer bikin.”
